Ўзбекистон Республикаси Ҳуқуқни муҳофаза қилиш академиясида Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси вакиллари билан учрашув бўлиб ўтди.
Учрашув давомида асосий эътибор ҳуқуқни муҳофаза қилувчи органлар ходимларини тайёрлаш, қайта тайёрлаш ва уларнинг малакасини ошириш жараёнларини фанлараро ёндашув асосида такомиллаштириш, шунингдек, ҳуқуқни муҳофаза қилиш соҳаси ходимларининг касбий компетенцияларини шакллантиришда ижтимоий-гуманитар фанларнинг ролига қаратилди.
Таъкидланганидек, замонавий ҳуқуқни муҳофаза қилиш фаолияти ходимлардан нафақат ҳуқуқий воситаларни профессионал даражада қўллай олишни, балки ривожланган таҳлилий тафаккур, юксак ҳуқуқий маданият, ахлоқий барқарорлик, коммуникатив компетентлик ҳамда ижтимоий жараёнларни чуқур англаш қобилиятини ҳам талаб этади.
Қозоғистон Академияси вакиллари Ҳуқуқни муҳофаза қилиш академиясининг таълим инфратузилмаси, ўқув жараёни учун яратилган замонавий шароитлар, илмий-тадқиқот салоҳияти ҳамда кадрлар тайёрлашнинг амалиётга йўналтирилган элементлари билан танишдилар.
Учрашув якунида томонлар ҳамкорликни янада ривожлантириш истиқболлари, жумладан, қўшма таълим ташаббусларини амалга ошириш, тажриба алмашиш ва ҳуқуқни муҳофаза қилувчи органлар учун кадрлар тайёрлаш соҳасида профессионал ҳамкорликни кенгайтириш масалалари юзасидан фикр алмашдилар.