“TASHKENT CYBERLEX – 2026” халқаро илмий-амалий форуми доирасида ташкил этилган биринчи параллел сессия ҳуқуқшунослик илми, юридик таълим ва ҳуқуқни қўллаш амалиётининг рақамли трансформация шароитидаги ривожланиш истиқболларига бағишланди.
“Юридик фан ва таълимдаги инновациялар: киберҳуқуқ, рақамли криминалистика ва сунъий интеллект” мавзусида ўтказилган сессия рақамли технологиялар жадал ривожланаётган шароитда юридик илм-фан ва таълим олдида турган янги вазифаларни муҳокама қилишга қаратилган нуфузли халқаро эксперт майдонига айланди.
Муҳокамалар марказида киберҳуқуқ, рақамли криминалистика, сунъий интеллект, рақамли далиллар, кибержиноятчиликка қарши курашиш, юридик таълимни модернизация қилиш ҳамда ҳуқуқни муҳофаза қилувчи органлар учун янги авлод илмий-педагогик кадрларини тайёрлаш каби долзарб масалалар ўрин олди.
Сессия ишида Вьетнам Социалистик Республикаси Олий халқ прокуратураси ҳузуридаги Прокуратура университети ректори Nguyen Van Khoat, Исроил полицияси Суд экспертизаси бўлинмаси ва Рақамли далиллар лабораторияси вакили Чибел Рон, АҚШнинг Техас университети Эль-Пасо филиали профессори Лиэнн Аларид, Япония Олий прокуратураси катта прокурори Кояма Тихиро, Корея Республикаси эксперти Ким Дон Хён ҳамда миллий илмий ва таълим муассасалари вакиллари иштирок этди.
Хорижий ва миллий экспертлар рақамли муҳитда прокурорлик таълими, суд экспертизасини юқори технологиялар асосида ривожлантириш, сунъий интеллектнинг давлат бошқаруви ва суд-ҳуқуқ тизимидаги ўрни, “қора қути” алгоритмларини ҳуқуқий тушунтириш, рақамли ҳуқуқ таълими, кибер-ҳуқуқий компетенциялар ва криптоактивлар билан боғлиқ ҳуқуқий муаммолар бўйича илмий ва амалий ёндашувларини тақдим этди.
Шунингдек, Ўзбекистоннинг етакчи илмий ва таълим муассасалари вакиллари томонидан юридик таълимнинг рақамли трансформацияси, сунъий интеллектдан ҳуқуқни муҳофаза қилиш ва суд амалиётида фойдаланиш, виртуал таълим экотизимлари ҳамда юридик илм-фаннинг рақамли ривожланиш стратегиясига оид муҳим таклиф ва ёндашувлар илгари сурилди.
Таъкидланганидек, рақамли трансформация ҳуқуқшунослик илм-фани ва таълим тизими учун нафақат янги технологияларни, балки ҳуқуқий тафаккур, тадқиқот методологияси ва кадрлар тайёрлашнинг мутлақо янги моделларини талаб этмоқда.
Биринчи параллел сессия “TASHKENT CYBERLEX–2026” форумининг энг мазмунан бой ва стратегик аҳамиятга эга илмий майдонларидан бири сифатида юридик фан, таълим ва амалиётни рақамли давр талаблари асосида янгилашга қаратилган ғоялар, илмий ёндашувлар ва амалий таклифларни бирлаштирди.