Ўзбекистон Республикаси Бош прокуратураси, Мажбурий ижро бюроси ҳамда Ҳуқуқни муҳофаза қилиш академияси вакилларидан иборат делегация Қирғиз Республикасида “Жиноятчиликка қарши курашиш самарадорлигини ошириш” мавзусида ўтказилган давра суҳбатида иштирок этди.
Тадбир Ўзбекистон ва Қирғизистон прокуратура органлари ўртасидаги амалий ҳамкорликни янада ривожлантириш, жиноятчиликнинг замонавий шаклларига қарши курашишда самарали механизмлар ва илғор тажрибаларни муҳокама қилишга бағишланди.
Давра суҳбати сессияларида жиноий активларни аниқлаш, қайтариш ва бошқариш, уларнинг трансчегаравий ҳаракатини кузатиш, молиявий тергов имкониятларидан фойдаланиш, шунингдек, хорижий юрисдикциялар билан тезкор ва ҳуқуқий ҳамкорликни кучайтириш масалалари кўриб чиқилди.
Алоҳида эътибор рақамли технологиялардан фойдаланиб содир этилаётган жиноятларни аниқлаш ва фош этиш, электрон далиллар билан ишлаш, ахборот алмашинувини жадаллаштириш ҳамда мутахассисларнинг касбий салоҳиятини оширишга қаратилди.
Шунингдек, суд ҳужжатлари ва бошқа органлар ҳужжатларининг ижросини таъминлаш механизмларини такомиллаштириш, ижро ҳаракатларини рақамлаштириш ва мазкур йўналишда замонавий ахборот технологияларидан самарали фойдаланиш масалалари юзасидан фикр алмашилди.
Ташриф доирасида ўтказилган амалий мулоқот замонавий таҳдидларга қарши курашишда қўлланилаётган ёндашувларни қиёсий баҳолаш, ўзаро тажриба алмашиш ва келгусидаги ҳамкорликнинг устувор йўналишларини белгилаш имконини берди.
Мазкур ташриф Ўзбекистон ва Қирғизистон прокуратура органлари ўртасидаги амалий ҳамкорликни мустаҳкамлаш, иштирокчиларнинг билим ва кўникмаларини бойитиш, шунингдек, ҳуқуқни қўллаш амалиётини янада такомиллаштиришга хизмат қилди.