Ҳуқуқни муҳофаза қилиш академияси Рақамли криминалистика илмий-тадқиқот институти томонидан Хоразм вилояти ва Қорақалпоғистон Республикаси прокуратуралари ходимлари учун амалий семинарлар ўтказилди.
Тадбирлар тергов фаолиятида рақамли технологиялардан самарали фойдаланиш, замонавий ахборот тизимларини амалиётга жорий этиш ҳамда ахборот-коммуникация технологияларидан фойдаланиб содир этилаётган жиноятларга қарши курашиш самарадорлигини оширишга бағишланди.
Семинарлар доирасида Ўзбекистон Республикаси Президентининг ПҚ–229-сон қарори асосида ишлаб чиқилган, рақамли криминалистиканинг техник воситалари билан жиҳозланган махсус жамланманинг функционал имкониятлари намойиш этилди. Иштирокчиларга мазкур воситалардан рақамли далилларни аниқлаш, йиғиш, сақлаш ва таҳлил қилиш жараёнларида фойдаланишнинг амалий жиҳатлари тушунтирилди.
Шунингдек, “Кўчма рақамли криминалистика лабораторияси”нинг техник имкониятлари тақдим этилди. Намойишлар давомида электрон қурилмалар ва рақамли муҳитдаги маълумотлар билан ишлаш, далилларни процессуал тартибда мустаҳкамлаш, уларнинг яхлитлигини таъминлаш ҳамда кейинги таҳлил учун тайёрлаш усуллари кўрсатиб берилди.
Очиқ мулоқот шаклида ўтган семинарларда тергов жараёнларини рақамлаштириш, замонавий криминалистик технологияларни ҳуқуқни муҳофаза қилувчи органлар амалиётига интеграция қилиш, электрон далиллар билан ишлаш сифатини ошириш ва кибержиноятларга қарши курашишда идоралараро ҳамкорликни кучайтириш масалалари муҳокама қилинди.
Бундай амалий тадбирлар рақамли криминалистика имкониятларини ҳудудларда кенг жорий этиш, тергов органлари ходимларининг касбий кўникмаларини мустаҳкамлаш ҳамда жиноятларни тезкор, сифатли ва холисона тергов қилишга хизмат қилади.