Ўзбекистон Республикаси Ҳарбий прокуратурасида Ўзбекистон Республикаси Ҳуқуқни муҳофаза қилиш академияси ходимлари иштирокида ахборот технологияларидан фойдаланиб содир этиладиган жиноятларни тергов қилишда рақамли криминалистика воситаларини қўллашга бағишланган ўқув-амалий машғулот ўтказилди.
Тадбирда Самарқанд, Навоий, Бухоро, Қарши, Термиз, Урганч, Нукус, Фарғона, Андижон ва Наманган ҳарбий прокуратуралари терговчилари иштирок этди.
Машғулот давомида кибержиноятчиликка қарши курашишда рақамли криминалистиканинг замонавий имкониятлари, шунингдек, OSINT – очиқ манбалардаги маълумотларни излаш, текшириш ва таҳлил қилиш усуллари кўриб чиқилди. Тергов фаолиятида махсус платформалар ва бошқа очиқ ахборот ресурсларидан фойдаланиш масалаларига алоҳида эътибор қаратилди.
Амалий қисм кибержиноятлар билан боғлиқ ишлар бўйича ҳодиса жойини кўздан кечиришнинг ўзига хос жиҳатлари, рақамли изларни аниқлаш ва қайд этиш, электрон далилларни олиб қўйиш ҳамда уларнинг сақланишини таъминлаш, шунингдек, рақамли криминалистиканинг айрим дастурий воситаларини қўллашга бағишланди.
Ўтказилган амалий машғулот иштирокчиларга рақамли изларни аниқлаш, қайд этиш ва сақлашнинг замонавий ёндашувларини мустаҳкамлаш, шунингдек, жиноятларни тергов қилишда очиқ маълумотлар ва рақамли воситалардан фойдаланиш имкониятларини кенгайтиришга хизмат қилди.