Ўзбекистон Республикаси Ҳуқуқни муҳофаза қилиш академиясида зўравонлик ва одам савдосидан жабрланган болалар иштирокидаги ишларни тергов қилиш ва кўриб чиқишда болага дўстона ёндашувларни қўллашга бағишланган икки кунлик халқаро ўқув тренинги бўлиб ўтди.
Тадбир Ўзбекистон Республикаси Бош прокуратураси, БМТнинг Болалар жамғармаси – ЮНИСЕФ, Болалар омбудсмани ва ЕХҲТ ҳамкорлигида ташкил этилди.
Тренингда Самарқанд ва Тошкент вилоятлари ҳамда Тошкент шаҳар прокуратура органларининг мазкур йўналишга масъул прокурор ёрдамчилари, шунингдек, Академия профессор-ўқитувчилари иштирок этди.
Халқаро экспертлар иштирокида ўтказилган назарий ва амалий машғулотларда вояга етмаганларни сўроқ қилиш методикаси, боланинг руҳий-эмоционал ҳолатини баҳолаш, тергов ҳаракатлари давомида такрорий руҳий жароҳатланишнинг олдини олиш ҳамда унинг процессуал ҳуқуқларини тўлиқ таъминлаш масалалари атрофлича кўриб чиқилди.
Шунингдек, ушбу тоифадаги жиноят ишлари бўйича прокурор назоратини амалга оширишнинг ўзига хос жиҳатлари, бола билан мулоқотда унинг ёши ва психологик хусусиятларини ҳисобга олиш, тергов ҳаракатларини хавфсиз ва ишончли муҳитда ўтказишга алоҳида эътибор қаратилди.
Амалий машғулотлар ва касбий муҳокамалар давомида иштирокчилар турли вазиятларни таҳлил қилиб, халқаро тажриба ҳамда миллий амалиёт юзасидан фикр алмашдилар. Тренинг уларнинг болалар иштирокидаги тергов ҳаракатларини эҳтиёткорлик, холислик ва касбий ёндашув асосида ташкил этиш бўйича билим ва кўникмаларини мустаҳкамлашга хизмат қилди.
Дастур доирасида болаларга нисбатан одил судловнинг халқаро стандартлари, жумладан, жабрланган боланинг қайта-қайта сўроқ қилиниши ва такрорий руҳий жароҳат олишининг олдини олишга қаратилган «Барнахус» модели тамойиллари ҳам ўрганилди.
Тренинг якунида болалар иштирокидаги тергов жараёнларини халқаро стандартлар асосида янада такомиллаштириш, идоралараро ҳамкорликни мустаҳкамлаш ҳамда бола манфаатини ҳар бир процессуал ҳаракат ва қарорнинг асосий мезони сифатида белгилаш зарурлиги таъкидланди.
Мазкур ўқув дастури тергов жараёнида болага шунчаки процесс иштирокчиси сифатида эмас, аввало алоҳида ҳимоя ва эҳтиёткор муносабатга муҳтож шахс сифатида ёндашишга хизмат қилди. Зеро, бола иштирок этган ҳар бир ишда терговнинг самарадорлиги нафақат жиноятни фош этиш, балки унинг шаъни, ҳуқуқлари ва руҳий осойишталиги қай даражада асралгани билан ҳам баҳоланади.