Ўзбекистон Республикаси Ҳуқуқни муҳофаза қилиш академиясида ҳуқуқни муҳофаза қилувчи органлар ва ижтимоий ҳимоя тизими мутахассислари учун болаларга нисбатан зўравонлик билан боғлиқ жиноятларни тергов қилишнинг замонавий усулларига бағишланган халқаро тренинг ўтказилди.
Тадбир Ўзбекистон Республикаси Президентининг 2025 йил 24 декабрдаги ПФ–256-сон Фармони билан тасдиқланган 2026–2030 йилларга мўлжалланган Болаларни зўравонликнинг барча шаклларидан ҳимоя қилиш стратегияси доирасида Академия, Бола ҳуқуқлари бўйича вакил – Болалар о мбудсмани ҳамда Ўзбекистон Республикаси Президенти ҳузуридаги Ижтимоий ҳимоя миллий агентлиги ҳамкорлигида ташкил этилди.
Машғулотларни Йўқолган ва эксплуатация қилинган болалар халқаро маркази – ICMEC (АҚШ) эксперти Триша Фиц онлайн форматда олиб борди. Тренингда Ички ишлар вазирлиги терговчилари, Академия профессор-ўқитувчилари, шунингдек, Ижтимоий ҳимоя миллий агентлигининг мамлакатимиз барча ҳудудларидан 168 нафар ижтимоий ходими иштирок этди.
Асосий эътибор зўравонликдан жабрланган боланинг ёши, психологик ҳолати ва манфаатларини инобатга олган ҳолда процессуал ҳаракатларни тўғри ташкил этиш, ишончли мулоқот ўрнатиш ва такрорий руҳий жароҳатланишнинг олдини олишга қаратилди. Болаларни сўроқ қилишнинг NICHD халқаро протоколи, «Барнахус» модели ҳамда болаларга дўстона одил судлов тамойилларини қўллашга доир амалий ёндашувлар муҳокама қилинди.
Шунингдек, онлайн-груминг, кибербуллинг, сексторшн ва болаларга таҳдид солувчи бошқа рақамли хавфларни аниқлаш ва ҳуқуқий баҳолаш, шунингдек, ҳуқуқни муҳофаза қилувчи органлар, ижтимоий хизматлар, психологлар, тиббиёт ва таълим муассасалари ўртасида самарали ҳамкорликни таъминлаш масалалари кўриб чиқилди.
Амалий кейслар ва процессуал вазиятлар таҳлили иштирокчиларга бола билан ишлашда учрайдиган типик хатоларни кўриб чиқиш ва самарали ҳаракат алгоритмларини шакллантириш имконини берди. Тренингда ўрганилган ёндашувлар болалар иштирокидаги тергов ҳаракатларининг сифатини ошириш, уларнинг ҳуқуқ ва қонуний манфаатларини ишончли таъминлаш ҳамда жабрланган боланинг иккиламчи виктимизациясига йўл қўймасликка хизмат қилади.