Ўзбекистон Республикаси Ҳуқуқни муҳофаза қилиш академиясида «Туронбанк» АТБнинг ички назорат ва комплаенс йўналишларида фаолият юритувчи ходимлари учун молиявий хавфсизликнинг долзарб масалаларига бағишланган уч кунлик махсус ўқув семинари ташкил этилди.
Ўқувларда банкнинг комплаенс-назорат, молиявий мониторинг, рискларни бошқариш, ички аудит ва молиявий хавфсизликни таъминлашга масъул ходимлари иштирок этди.
Семинар дастури жиноий фаолиятдан олинган даромадларни легаллаштириш ва терроризмни молиялаштиришга қарши курашиш, самарали ички назорат тизимини ташкил этиш, комплаенс-рискларни аниқлаш ва минималлаштириш, манфаатлар тўқнашувининг олдини олиш ҳамда шубҳали операцияларни аниқлаш масалаларини қамраб олди.
Алоҳида эътибор миллий қонунчилик ва FATF халқаро стандартлари талабларини амалиётда қўллаш, мижозларни лозим даражада текшириш (Customer Due Diligence – CDD), мақсадли молиявий санкциялар, молиявий мониторинг ҳамда банк фаолиятида ички назорат ва комплаенс механизмларини такомиллаштиришга қаратилди.
Машғулотлар реал ва моделлаштирилган кейслар, амалий вазиятлар таҳлили ва профессионал муҳокамалар асосида ташкил этилди. Бу иштирокчиларга назарий билимларни конкрет ҳолатларда қўллаш, комплаенс ва молиявий хавфсизлик соҳасидаги рискларни баҳолаш ҳамда уларни минималлаштириш бўйича амалий ёндашувларни такомиллаштириш имконини берди.
Семинарда Академия ходимлари ва ваколатли давлат органлари мутахассислари спикер сифатида иштирок этиб, қонунчиликни қўллаш амалиёти, молиявий мониторингнинг замонавий механизмлари ва халқаро стандартларни банк фаолиятига татбиқ этишга доир ёндашувларни тақдим этдилар.
Махсус ўқув семинари банк тизимида самарали ички назорат ва комплаенс маданиятини мустаҳкамлаш, молиявий ҳуқуқбузарликлар билан боғлиқ рискларни барвақт аниқлаш ҳамда банкнинг молиявий хавфсизлигини таъминлаш бўйича ходимларнинг амалий компетенцияларини ривожлантиришга хизмат қилди.