Ўзбекистон Республикаси Ҳуқуқни муҳофаза қилиш академиясида 2025/2026 ўқув йилида магистратурани муваффақиятли тамомлаган битирувчиларга «Ҳуқуқ магистри» дипломлари ҳамда «Академик кўкрак нишони» тантанали равишда топширилди. Маросим Академияда ҳуқуқни муҳофаза қилиш соҳасининг устувор йўналишлари учун чуқур назарий билим, амалий ва таҳлилий компетенцияларга эга кадрлар тайёрлаш борасидаги тизимли ишларнинг навбатдаги натижасини ифодалади.
Битирувчилар магистратуранинг «Прокурорлик фаолияти», «Тергов фаолияти», «Коррупцияга қарши курашиш», «Инсон ҳуқуқларига оид халқаро ҳуқуқ» ҳамда «Киберхавфсизликни ҳуқуқий таъминлаш» мутахассисликлари бўйича таҳсил олди. Жорий йилда 2025/2026 ўқув йилидан Академияда жорий этилган «Киберхавфсизликни ҳуқуқий таъминлаш» мутахассислигининг илк битирувчиларига ҳам дипломлар топширилди. Мазкур илк битирув рақамли муҳитни ҳуқуқий тартибга солиш, ахборот хавфсизлигининг ҳуқуқий асосларини мустаҳкамлаш ва кибертаҳдидларга қарши курашиш соҳасида малакали кадрлар тайёрлаш йўлидаги муҳим қадам бўлди.
Тадбирда Бош прокуратура ва Академия раҳбарияти, профессор-ўқитувчилар, ваколатли давлат органлари вакиллари, битирувчилар ва уларнинг ота-оналари, шунингдек, оммавий ахборот воситалари вакиллари иштирок этди.
Академия магистратурасида таълим замонавий талаблар асосида ташкил этилиб, назарий тайёргарликни ҳуқуқни қўллаш амалиёти ва илмий изланишлар билан уйғунлаштиришга қаратилган. Ўқув жараёни магистрантларнинг ҳуқуқий жараёнларни чуқур таҳлил қилиш, илмий асосланган хулосалар ишлаб чиқиш ва мураккаб касбий вазифаларга самарали ечим топиш компетенцияларини ҳамда илмий-тадқиқот салоҳиятини ривожлантиришга хизмат қилмоқда. Миллий ва хорижий экспертларнинг таълим жараёнига кенг жалб этилиши тайёргарликнинг амалий мазмуни ва илмий савиясини янада оширмоқда.
Магистратура доирасидаги халқаро ҳамкорлик ҳам изчил кенгайиб бормоқда. Магистрантлар Польшанинг Гданьск университети, Жанубий Корея халқаро ҳамкорлик агентлиги ҳамда Корея Адлия институти билан ҳамкорликда ташкил этилган халқаро ўқув дастурларида фаол иштирок этиб, хорижий тажриба ва замонавий ёндашувларни ўзлаштириш имкониятига эга бўлмоқда.
Академия магистратурасида таҳсил олишга бўлган қизиқиш йилдан-йилга ортиб бораётгани ҳам қайд этилди. Хусусан, 2026/2027 ўқув йили учун ўтказилган қабул жараёнида номзодлар сони ўтган йилги кўрсаткичга нисбатан сезиларли даражада ошди.
Академия раҳбарияти битирувчиларни магистратура босқичини муваффақиятли якунлагани билан табриклаб, уларга келгуси касбий ва илмий фаолиятида муваффақиятлар тилади. Эгалланган билим ва компетенцияларни қонун устуворлигини таъминлаш, инсон ҳуқуқларини ҳимоя қилиш, шунингдек, рақамлашув ва янги ҳуқуқий чақириқлар шароитида мамлакатимиз ҳуқуқни муҳофаза қилиш тизимини янада ривожлантириш йўлида самарали қўллаш битирувчилар олдида турган муҳим вазифа экани таъкидланди.