Таътил кунларида пойтахт мактабларининг битирувчи синф ўқувчилари Ўзбекистон Республикаси Ҳуқуқни муҳофаза қилиш академиясига ташриф буюрди. Очиқ эшиклар куни ёшларга Академиядаги таълим муҳити билан яқиндан танишиш, ўқишга қабул тартиби ҳақида маълумот олиш ва тажрибали мутахассислар билан мулоқот қилиш имконини берди.
Тадбир иштирокчиларига Академия фаолияти, бакалавриатга қабул қилиш ва ўқитиш тартиби, шунингдек, таълим жараёнини ташкил этишнинг ўзига хос жиҳатлари ҳақида батафсил маълумот берилди. Очиқ мулоқот давомида ўқувчилар ўзларини қизиқтирган саволларга Академия ходимларидан бевосита жавоб олдилар.
Кўп йиллик амалий тажрибага эга терговчи билан учрашув тадбирнинг алоҳида қисми бўлди. У тергов фаолиятининг ўзига хос хусусиятлари, ушбу касб тақозо этадиган масъулият, билим ва шахсий фазилатлар ҳақида сўзлаб, ёшларга келгуси касбий йўлини танлаш бўйича амалий тавсиялар берди.
Шунингдек, ўқувчилар Академия ҳузуридаги PreAcademy тайёрлов курслари фаолияти, ўқиш шартлари ва яратилган имкониятлар билан танишдилар. Учрашув уларнинг Академия ва ҳуқуқшунослик касби ҳақидаги тасаввурларини бойитиб, келгуси таълим йўналишини пухта ўйлаб танлашларига кўмаклашди.