Душанбе шаҳрида кибержиноятчиликка қарши курашиш соҳасида малака оширишга қаратилган уч босқичли минтақавий ташаббуснинг навбатдаги босқичи бўлиб ўтди. Рақамли криминалистика ва очиқ манбалар асосида разведка олиб бориш (OSINT) бўйича машғулотларни Ўзбекистон Республикаси Ҳуқуқни муҳофаза қилиш академиясининг икки нафар эксперти олиб борди.
Ихтисослаштирилган ўқув курсида Тожикистон Республикаси ҳуқуқни муҳофаза қилувчи органларининг 18 нафар ходими – Ички ишлар вазирлигининг 13 нафар ходими ва Бош прокуратуранинг 5 нафар прокурори иштирок этди.
Уч кунлик дастурда кибержиноятларнинг асосий турлари, рақамли криминалистика асослари, рақамли далиллар билан ишлаш хусусиятлари ҳамда OSINT воситалари қамраб олинди. Иштирокчилар даркнет ресурсларидан фойдаланиб содир этиладиган жиноятларни тергов қилиш усулларини ҳам кўриб чиқди.
Курс ЕХҲТнинг Душанбе шаҳридаги Дастурий офиси ва Ўзбекистон Республикаси Бош прокуратураси билан ҳамкорликда ўтказилди. Минтақавий ташаббус уч босқичдан иборат: дастлабки икки босқич Душанбе шаҳрида ўтказилди, якуний босқични Тошкент шаҳрида ташкил этиш режалаштирилган.
Ушбу ташаббус икки давлат ўртасида эришилган келишувларни амалда рўёбга чиқаришга ҳамда Ўзбекистон ва Тожикистон ҳуқуқни муҳофаза қилувчи органлари ўртасидаги алоқаларни, жумладан, кибержиноятчиликка қарши курашиш ва киберхавфсизликни таъминлаш соҳасидаги ҳамкорликни мустаҳкамлашга хизмат қилади.