Қўшма таълим дастури Ўзбекистон Республикаси Ҳуқуқни муҳофаза қилиш академияси ҳамда «Янка Купала номидаги Гродно давлат университети» таълим муассасаси (Беларусь Республикаси) томонидан ҳамкорликда амалга оширилади.
Дастур Янка Купала номидаги Гродно давлат университетининг 6-05-0421-01 – «Ҳуқуқшунослик» мутахассислиги ҳамда Ўзбекистон Республикаси Ҳуқуқни муҳофаза қилиш академиясининг 60420100 – «Юриспруденция» таълим йўналиши бўйича ўқишни назарда тутади.
Ўқиш муддати тўрт йил бўлиб, «2+2» модели асосида ташкил этилади: дастлабки икки ўқув йилида (1–4-семестрлар) талабалар Янка Купала номидаги Гродно давлат университетида, кейинги икки ўқув йилида (5–8-семестрлар) эса Ўзбекистон Республикаси Ҳуқуқни муҳофаза қилиш академиясида таҳсил оладилар.
Таълим кундузги шаклда, рус тилида ва тўлов-контракт асосида амалга оширилади.
Ўқишга қабул қилиш икки босқичда амалга оширилади.
Биринчи босқич – оғзаки суҳбат шаклидаги кириш синови. Суҳбат Янка Купала номидаги Гродно давлат университети вакилларидан шакллантирилган фан бўйича имтиҳон комиссияси томонидан ўтказилади.
Биринчи босқич натижаларига кўра тўплаш мумкин бўлган энг юқори баллнинг камида 30 фоизини тўплаган абитуриентлар иккинчи босқичда иштирок этишга қўйилади.
Иккинчи босқич – рус тили бўйича кириш имтиҳони бўлиб, у Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги билан келишилган муддатларда ўтказилади.
Иккинчи босқич натижаларига кўра тўплаш мумкин бўлган энг юқори баллнинг камида 30 фоизини тўплаган абитуриентлар танловда иштирок этишга қўйилади.
Ўқишга қабул қилиш кириш синовлари натижаларига кўра, тасдиқланган қабул параметрлари доирасида танлов асосида амалга оширилади.
Ҳужжатларни топшириш учун номзодлар 2026 йил 16 сентябрга қадар (шу куни ҳам) Академиянинг махсус электрон платформаси – https://admission.proacademy.uz/ орқали рўйхатдан ўтишлари ва қуйидаги ҳужжатларни юклашлари лозим:
1. Ўрганилган фанлар ва улар бўйича олинган баҳо (балл)лар кўрсатилган умумий ўрта таълим тўғрисидаги аттестат ёки ўрта махсус ёхуд профессионал таълим тўғрисидаги диплом.
2. Паспорт ёки ID-карта нусхаси.
3. Ваколатли соғлиқни сақлаш муассасаси томонидан берилган ОИВ инфекцияси мавжуд эмаслиги тўғрисидаги сертификат.
4. Номзоднинг психоневрология диспансери ҳисобида турмаслиги тўғрисидаги маълумотнома.
5. Номзоднинг наркология диспансери ҳисобида турмаслиги тўғрисидаги маълумотнома.
6. 3×4 см ўлчамдаги 10 дона фотосурат.
Ўзбек тилида расмийлаштирилган ҳужжатларга уларнинг нотариал тартибда тасдиқланган рус тилидаги таржимаси ҳам илова қилиниши шарт.
Рус тилини билиш даражасини тасдиқловчи сертификатлар қабул қилинмайди.
Зарур ҳолларда қўшимча ҳужжатлар талаб қилиниши мумкин.
Қабул масалалари бўйича қўшимча маълумотни +998 (71) 202-04-96 (ички рақамлар: 1727, 1991) телефон рақами орқали олиш мумкин