2026/2027 ўқув йилида Ўзбекистон Республикаси Ҳуқуқни муҳофаза қилиш академияси янги талабаларни қабул қилди. Маросимда уларнинг таълим олиши ва касбий шаклланишига доир асосий устувор йўналишлар белгилаб берилди. Шу билан бирга, Академияда “Киберҳуқуқ” бакалавриат таълим йўналиши бўйича ўқув жараёни бошланди.
Очилиш маросимида Ўзбекистон прокуратураси Фахрийлар кенгаши аъзолари, Академия раҳбарияти ва профессор-ўқитувчилари, талабаларнинг ота-оналари ҳамда жамоатчилик вакиллари иштирок этди. Тадбир “Ягона Ватан, ягона халқ бўлиб, янги ҳаёт ва келажак яратамиз!” деган бош ғояни ўзида мужассам этди. Кириш синовларида энг юқори балл тўплаб, давлат грантлари асосида талабаликка тавсия этилган ёшлар Академия бошлиғи томонидан рағбатлантирилди.
Сўнгги уч йилда Академияда таҳсил олувчилар сони қарийб 300 нафардан 1500 нафарга етди. Бунга янги таълим йўналишларининг очилиши ва иш берувчилар таклифлари асосида қабул квоталарининг оширилиши хизмат қилди. “Киберҳуқуқ” йўналиши Ўзбекистон Республикаси Президентининг 2025 йил 3 ноябрдаги ПФ–204-сон Фармонига мувофиқ жорий этилди. Жорий йилда Академия “Тергов фаолияти” йўналиши бўйича илк битирувчиларни ҳам тайёрлади: 220 нафар битирувчи ваколатли давлат органларининг тергов тармоқларида хизмат ўташ учун йўналтирилиб, уларнинг 100 фоиз бандлиги таъминланди.
Ўтган ўқув йилида Академия талабалари илк бор Ўзбекистон Республикаси Президентининг давлат стипендияси ва Ислом Каримов номидаги давлат стипендияси соҳиблари бўлди. “Тергов фаолияти” йўналишининг битирувчи талабалари Ўзбекистон жамоаси таркибида Молиявий хавфсизлик бўйича V халқаро олимпиаданинг “Халқаро муносабатлар” йўналишида ғолибликни қўлга киритди. Академия талабалари Гаага шаҳрида ўтказилган халқаро жиноят ҳуқуқи бўйича танловнинг якуний босқичида ҳам илк бор иштирок этди. Ўқув йили давомида жами 37 нафар талаба хорижий давлатларда ўтказилган конференция, семинар ва тажриба алмашинув дастурларида қатнашди.
Янги талабалар таълим жараёнининг мазмуни ва ўзига хос хусусиятлари билан таништирилди. Ўқув жараёнида жиноятларни квалификация қилиш ва процессуал ҳужжатларни тайёрлаш кўникмаларини шакллантириш, рақамли кўникмалар ва стрессга бардошлиликни ривожлантириш, шунингдек, дуал таълимни янада такомиллаштиришга алоҳида эътибор қаратилади. Талабаларнинг мулоқот маданияти, жамоада ишлаш, танқидий фикрлаш, лидерлик ва қарор қабул қилиш қобилиятлари мунтазам ўрганиб, баҳолаб борилади.
Сўзга чиққанлар талабалар эътиборини инсон ҳуқуқ ва эркинликларини ҳимоя қилиш билан бевосита боғлиқ бўлган касбнинг юксак масъулиятига қаратди. Интизом таълим жараёнидаги мажбурий талабгина эмас, балки ҳуқуқни муҳофаза қилувчи органлардаги келгуси хизматга тайёрликнинг муҳим мезони экани таъкидланди. Талабалар қабул жараёни шаффоф ва адолатли ўтганини, ота-оналар эса Академияда сифатли таълим олиш учун муносиб имкониятлар яратилганини қайд этди. Ички тартиб-қоидалар, электрон таълим платформаси ва мобил илова имкониятлари билан танишган янги талабалар ўқув машғулотларига киришди.