Ўзбекистон Республикаси Ҳуқуқни муҳофаза қилиш академиясида БМТнинг гендер тенглигини таъминлаш ҳамда хотин-қизларнинг ҳуқуқ ва имкониятларини кенгайтиришга қаратилган 5-сонли Барқарор ривожланиш мақсадини (BRM 5) амалга ошириш доирасида «Рақамлаштириш даврида ҳуқуқни муҳофаза қилиш соҳасидаги етакчи аёллар» мавзусида давра суҳбати бўлиб ўтди.

Тадбир хотин-қизларнинг касбий салоҳиятини ривожлантириш, уларнинг ҳуқуқни муҳофаза қилиш фаолиятида иштирок этиш имкониятларини кенгайтириш, амалий тажриба алмашиш, шунингдек, замонавий рақамли трансформация жараёнларини ҳисобга олган ҳолда талаба қизларда касбий мўлжаллар ва етакчилик фазилатларини шакллантириш мақсадида ташкил этилди.

Давра суҳбатида раҳбар аёлларнинг касбий йўли, ҳуқуқни муҳофаза қилиш тизимида гендер сиёсатини амалга оширишга замонавий ёндашувлар, жамоат хавфсизлигини таъминлашда аёлларнинг роли, рақамлаштириш шароитида кадрлар тайёрлаш, шунингдек, киберхавфсизлик, рақамли криминалистика ва суд-экспертиза фаолияти соҳаларида аёлларнинг иштироки истиқболларига алоҳида эътибор қаратилди.

Тадбир давомида Ўзбекистон Республикаси Бош прокуратураси, Ички ишлар вазирлиги, Жамоат хавфсизлиги университети, ИИВ Академияси, Cyber University ҳамда Адлия вазирлиги ҳузуридаги Х.Сулаймонова номидаги Республика суд экспертизаси маркази вакиллари ўз касбий тажрибалари билан бўлишдилар.

Бундай учрашувларнинг ўтказилиши авлодлар ўртасида касбий тажриба ворислигини таъминлашга, ҳуқуқни муҳофаза қилиш соҳасида касбий фаолиятни танлаган аёллар ва қизларни қўллаб-қувватлашга, шунингдек, талаба қизларда касбий ривожланиш, етакчилик ва замонавий рақамли компетенцияларни ўзлаштиришга бўлган интилишни шакллантиришга хизмат қилади.

Тадбир 60 дан ортиқ иштирокчини бирлаштирди.