Ҳуқуқни муҳофаза қилиш академияси делегацияси Минск шаҳрида бўлиб ўтган МДҲнинг Коррупцияга қарши курашиш бўйича давлатлараро кенгаши XI мажлисида қатнашди.
Кенгаш мажлисида Арманистон, Беларусь, Қозоғистон, Қирғизистон, Россия, Тожикистон ва Ўзбекистоннинг коррупцияга қарши курашиш соҳасидаги ваколатли давлат органлари раҳбарлари иштирок этди.
Мажлис кун тартибидаги муҳим масалалардан бири сифатида Ҳуқуқни муҳофаза қилиш академиясига МДҲ иштирокчи давлатларининг коррупцияга қарши курашиш соҳасидаги таянч таълим ташкилоти мақомини бериш юзасидан Ўзбекистон Республикасининг ташаббуси кўриб чиқилди.
Мазкур масала муҳокамаси доирасида Академия бошлиғининг биринчи ўринбосари Евгений Вячеславович Коленко тақдимот ўтказиб, Академиянинг коррупцияга қарши курашиш соҳасидаги фаолияти, шу жумладан, таълим, илмий-тадқиқот ва эксперт-таҳлилий йўналишлардаги ишлари, мавжуд салоҳияти ҳамда истиқболдаги имкониятлари ҳақида батафсил маълумот берди.
Кенгаш аъзолари Академиянинг келгусида МДҲ иштирокчи давлатларининг коррупцияга қарши курашиш соҳасида фаолият юритувчи идоралари, прокуратура, тергов ва бошқа ҳуқуқни муҳофаза қилувчи органлари вакилларини тайёрлаш ва уларнинг малакасини ошириш, шунингдек, соҳада илмий тадқиқотлар ва эксперт-таҳлилий ишларни амалга оширувчи етакчи муассаса сифатидаги салоҳиятини юқори баҳоладилар.
Муҳокамалар якунида Ҳуқуқни муҳофаза қилиш академиясига МДҲ иштирокчи давлатларининг коррупцияга қарши курашиш соҳасидаги таянч таълим ташкилоти мақомини бериш ташаббуси Кенгаш аъзолари томонидан қўллаб-қувватланди.
Кенгашнинг мазкур қарори келгусида МДҲ Ижроия қўмитаси ҳамда МДҲ Ташқи ишлар вазирлари кенгаши томонидан кўриб чиқилиб, тасдиқланиши кутилмоқда.
Шунингдек, тадбир доирасида Академия томонидан коррупцияга қарши курашиш соҳасидаги икки томонлама ҳамкорликни янада мустаҳкамлаш мақсадида Беларусь Республикасининг қатор таълим ва илмий-тадқиқот муассасалари билан учрашувлар ташкил этилди.
Хусусан, Кенгаш мажлиси доирасида Академия делегацияси Беларусь Республикаси Бош прокуратурасининг Илмий-тадқиқот маркази директори, ю.ф.д. Игорь Анатольевич Мороз билан икки томонлама учрашув ўтказди.
Учрашувда томонлар учун ўзаро манфаатли бўлган йўналишларда, жумладан, коррупцияга қарши курашиш, прокурорлик назорати фаолиятини илмий-услубий жиҳатдан қўллаб-қувватлаш, қўшма тадқиқотлар олиб бориш ҳамда бошқа соҳаларда ҳамкорликни ривожлантириш истиқболлари муҳокама қилинди.
Бундан ташқари, Ўзбекистон ва Беларусь ҳуқуқни муҳофаза қилувчи органлари учун юқори малакали кадрлар тайёрлаш соҳасидаги ҳамкорликни янада фаоллаштириш, шунингдек, инновацион таълим технологиялари бўйича тажриба алмашиш мақсадида Академия делегацияси Беларусь Республикасининг “Тергов қўмитасининг малака ошириш ва қайта тайёрлаш институти” таълим муассасасига ташриф буюрди.
Ташриф доирасида Институт бошлиғи, ю.ф.н., доцент Юрий Францевич Каменецкий билан икки томонлама учрашув ўтказилди.
Музокаралар давомида ўзаро манфаатли ҳамкорликнинг истиқболли йўналишлари, жумладан, кибермакондаги жиноятчиликка қарши курашиш масалалари бўйича қўшма ўқув машғулотларини ташкил этиш, илғор тажриба ва методикаларни ўзаро алмашиш масалалари атрофлича муҳокама қилинди.
Шунингдек, Академия делегацияси Беларусь Республикаси Ички ишлар вазирлиги Академиясига ташриф буюриб, ИИВ Академияси бошлиғи вазифасини вақтинча бажарувчи Алексей Владимирович Башан билан икки томонлама учрашув ўтказди.
Учрашув давомида томонлар ўзаро ҳамкорликнинг истиқболли йўналишларини муҳокама қилиб, икки академия ўртасида таълим ва илмий-тадқиқот соҳаларидаги ҳамкорликни ривожлантириш ва мустаҳкамлашга қаратилган меморандум имзоланди.
Меморандум томонлар ўртасида таълим жараёнини рақамлаштириш ва масофавий таълим технологияларини жорий этиш бўйича ҳамкорликни кучайтириш, кибержиноятчиликка қарши курашиш соҳасида тажриба алмашиш, профессор-ўқитувчиларнинг ўзаро стажировкаларини ташкил этиш, қўшма таълим ва илмий лойиҳаларни амалга ошириш ҳамда бошқа ўзаро манфаатли йўналишларда ҳамкорлик қилишни назарда тутади.
Беларусь Республикасига амалга оширилган хизмат сафари Ҳуқуқни муҳофаза қилиш академиясининг халқаро ҳамкорлигини янада ривожлантириш нуқтаи назаридан муҳим аҳамият касб этди.
Ташриф Академиянинг коррупцияга қарши курашиш соҳасидаги таълим, илмий-тадқиқот ва эксперт-таҳлилий фаолиятини МДҲ мамлакатлари миқёсида кенгайтириш, илғор хорижий тажрибани ўрганиш ва ўзаро алмашиш, коррупцияга қарши курашиш, прокурорлик ва тергов соҳалари учун юқори малакали кадрлар тайёрлаш имкониятларини кенгайтириш, шунингдек, кибержиноятларни аниқлаш ва фош этиш бўйича замонавий амалиётларни ўзлаштиришга хизмат қилади.
Академияга МДҲ доирасида коррупцияга қарши курашиш соҳасидаги таянч таълим ташкилоти мақомининг берилиши унинг халқаро таълим ва илмий платформалардаги ўрнини янада мустаҳкамлаб, минтақада коррупцияга қарши курашиш соҳасида кадрлар салоҳиятини ошириш, илмий ва эксперт ҳамкорликни ривожлантириш учун янги имкониятлар яратади.
Мазкур мақом, шунингдек, 2027 йилда ўтказилиши режалаштирилган БМТнинг Коррупцияга қарши конвенцияси иштирокчи давлатлари конференцияси доирасида белгиланган мақсад ва вазифаларни самарали амалга оширишга муносиб ҳисса қўшади.