Ҳуқуқни муҳофаза қилиш академияси томонидан Мудофаа вазирлигида “Коррупция тарихи, қонунчиликдаги янги талаблар ва ҳарбий хизматда ҳалоллик” мавзусида семинар ташкил этилди.

Аралаш тарзда ўтказилган тадбирда Мудофаа вазирининг комплаенс ва коррупцияга қарши ички назорат бўйича ўринбосари, шунингдек, вазирликнинг республика бўйича барча ҳарбий қисмлари ва тузилмалари ҳарбий хизматчилари иштирок этди.

Тадбирда Академиянинг Коррупцияга қарши курашиш илмий-таълим маркази ходими тақдимот билан чиқиб, иштирокчиларга коррупциянинг ҳуқуқий мазмуни, коррупцияга оид ҳуқуқбузарликлар ҳамда қонунчиликдаги янги талаблар ҳақида маълумот берди.  

Шунингдек, иштирокчиларга “Коррупцияга қарши курашиш виртуал академияси” электрон платформасининг таълим имкониятлари таништирилиб, ҳуқуқий билимларни мунтазам ошириш, уларни кундалик хизмат фаолиятида қўллаш ва раҳбарларнинг шахсий намунаси орқали ҳалоллик маданиятини мустаҳкамлаш муҳимлиги қайд этилди.