Ўзбекистон Республикаси Ҳуқуқни муҳофаза қилиш академияси раҳбарияти ҳамда Рақамли криминалистика илмий-тадқиқот институти ходимлари Андижон вилоятмда кибержиноятларнинг келиб чиқиш сабаб ва шарт-шароитларини илмий ёндашувлар асосида ўрганди.

Мазкур ишлар Давлатимиз раҳбарининг Андижон вилоятига ташрифи давомида белгилаб берилган вазифалар ижроси доирасида амалга оширилди. Ўрганиш натижалари бўйича кибержиноятларнинг олдини барвақт олиш, уларнинг содир этилишига имкон берувчи сабаб ва шарт-шароитларни ўз вақтида аниқлаш ва бартараф этиш, шунингдек, тергов самарадорлигини оширишга қаратилган таклифлар ишлаб чиқилди. Аҳолини кибержиноятларнинг янги усул ва схемаларидан огоҳлантириш, рақамли саводхонликни ошириш ҳамда ахборот муҳитида хавфсиз хулқ-атвор кўникмаларини шакллантириш учун тарқатма материаллар тайёрланди.

Андижон шаҳрида маҳалла еттилиги аъзолари ва бошқа масъул ташкилотлар ходимлари иштирокида учрашув ўтказилди. Унда кенг тарқалаётган кибержиноятларнинг содир этилиш усуллари, фуқароларни улардан ҳимоя қилиш ва профилактика чоралари тушунтирилди. Иштирокчиларга аҳолини огоҳлантиришга мўлжалланган тарқатма материаллар ва видеороликлар тақдим этилди. Шунингдек, «APK Qo‘riqchi» мобил иловасини аҳоли ва ташкилотлар ходимлари ўртасида кенг жорий этиш бўйича тушунтиришлар берилди.

Андижон шаҳридаги «Дўстлик» МФЙда маҳалла еттилиги аъзолари билан алоҳида профилактик учрашув ўтказилди. Уларнинг мобил қурилмаларига «APK Qo‘riqchi» иловаси ўрнатилиб, ундан фойдаланиш тартиби амалий кўрсатиб берилди.

Шу тариқа, Академиянинг кибержиноятлар сабабларини ўрганиш бўйича иши аҳолини огоҳлантириш ва маҳалла даражасидаги профилактик тадбирлар билан давом эттирилди.