Ўзбекистон Республикаси Ҳуқуқни муҳофаза қилиш академияси бошлиғининг ўринбосари А.Одинаев ва профессор-ўқитувчилардан иборат ишчи гуруҳ 29 сентябрь куни Тошкент вилоятининг Олмалиқ шаҳридаги Темур Малик маҳалласида криминоген вазиятни ўрганди. Асосий эътибор ҳуқуқбузарликларнинг келиб чиқиш сабаб ва шарт-шароитлари ҳамда ҳудудга хос хавф омилларига қаратилди.

Мазкур ўрганиш Академия томонидан Олмалиқ ва Ангрен шаҳарларида олиб борилаётган комплекс илмий-амалий ишлар доирасида ўтказилди. Бу ишлар ҳуқуқбузарликларнинг барвақт олдини олиш ҳамда маҳаллаларда хавфсиз ва барқарор ижтимоий муҳитни шакллантиришга қаратилган.

Олмалиқ ва Ангрендаги ўрганишлар натижасида ҳудудларнинг ўзига хос хусусиятлари ҳисобга олиниб, жиноятчиликнинг олдини олиш ҳамда унинг сабаб ва шарт-шароитларини бартараф этиш бўйича манзилли илмий-амалий тавсиялар ишлаб чиқилди.

Ҳозирда мазкур тавсияларни амалиётга татбиқ этиш, профилактика ишларининг натижадорлигини мунтазам баҳолаш ҳамда кўрилаётган чораларнинг ҳудудлардаги ҳуқуқбузарликлар ҳолатига таъсирини ўрганиш бўйича ишлар олиб борилмоқда.

Шунингдек, Академия маҳаллаларда профилактика тизимини мустаҳкамлаш мақсадида «маҳалла еттилиги» аъзолари учун ўқув-семинарлар ташкил этмоқда. Машғулотларда ҳуқуқий саводхонликни ошириш, оилавий низоларни барвақт аниқлаш ва ҳал этиш, ижтимоий профилактика самарадорлигини кучайтириш ҳамда аҳоли билан бевосита ва манзилли ишлаш кўникмаларини ривожлантиришга алоҳида эътибор қаратилмоқда.