Ўзбекистон Республикаси Ҳуқуқни муҳофаза қилиш академиясида бакалавриатнинг 1-босқич талабалари учун Ўзбекистон Республикаси Миллий гвардияси Фахрий қоровул батальони ҳарбий хизматчилари билан ҳамкорликда амалий машғулот ўтказилди.

Ўқув режаси ва дастурига мувофиқ, «Ҳарбий ва жисмоний тайёргарлик» модули доирасида «Саф тайёргарлиги» фанидан илк машғулот ташкил этилди. Унинг мавзуси «Қуролсиз бажариладиган саф амаллари ва ҳаракатлари» бўлди.

Машғулот аввалида ҳарбий хизматчилар саф амалларини кўргазмали тарзда намойиш этди. Шундан сўнг улар билан биргаликда талабалар сафда қад ростлаб туриш, жойида бурилиш, ҳарбийча салом бериш, сафдан чиқиш ва сафга қайтиш, шунингдек, барабан садоси остида сафда юриш машқларини амалий ўрганди.

Саф тайёргарлиги қадди-қоматни тўғри тутиш, ҳаракатлар аниқлиги ва ташқи кўриниш озодалиги билан бир қаторда интизомлилик, ҳушёрлик ҳамда ўз ҳаракатларини бошқара олиш кўникмаларини ривожлантиришга хизмат қилади. Амалиётчи ҳарбий хизматчилар иштирокидаги машғулот талабаларни келгуси хизмат фаолиятига тайёрлашнинг амалий қисмидир.