Ўзбекистон Республикаси Ҳуқуқни муҳофаза қилиш академияси ишчи гуруҳи Тошкент вилояти Олмалиқ шаҳрининг Алишер Навоий ва Мирзо Улуғбек маҳаллаларида криминоген вазиятни ўрганди. Ҳуқуқбузарликларнинг ҳудудга хос хусусиятлари ҳамда жиноятчиликка таъсир этувчи омиллар таҳлил қилинди.

Ўрганиш Ўзбекистон Республикаси Президентининг 2026 йил 5 январдаги «Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида»ги ПҚ–1-сон қарори ижроси доирасида ўтказилди. Мазкур фаолият Академиянинг Олмалиқ ва Ангрен шаҳарларида ҳуқуқбузарликларнинг барвақт олдини олиш ҳамда хавфсиз ва барқарор ижтимоий муҳитни шакллантиришга қаратилган комплекс илмий-амалий ишларининг бир қисмидир.

Икки шаҳарда олиб борилган ўрганишлар натижасида ҳудудларнинг ўзига хос хусусиятларини ҳисобга олган ҳолда жиноятчиликнинг олдини олиш, унинг сабаб ва шарт-шароитларини бартараф этиш бўйича манзилли илмий-амалий тавсиялар ишлаб чиқилди. Ҳозирда ушбу тавсияларни амалиётга татбиқ этиш, профилактика чораларининг натижадорлигини мунтазам баҳолаш ва уларнинг ҳуқуқбузарликлар ҳолатига таъсирини ўрганиш ишлари давом этмоқда.

Шунингдек, Академия маҳаллаларда профилактика тизимини мустаҳкамлаш мақсадида «маҳалла еттилиги» аъзолари учун ўқув-семинарлар ташкил этмоқда. Ишчи гуруҳ таҳлиллар асосида манзилли профилактика тизимини жорий этиш бўйича илмий асосланган таклифлар бериб бормоқда.