Ўзбекистон Республикаси Ҳуқуқни муҳофаза қилиш академиясида бакалавриатнинг 2-босқич талабалари учун Жамоат хавфсизлиги университети ўқитувчиси ва Миллий гвардия тиббиёт хизмати мутахассислари иштирокида машғулотлар ўтказилди. Талабалар жароҳатланиш ва қон кетиш ҳолатларида ўзларига ҳамда бошқаларга биринчи ёрдам кўрсатиш усулларини ўрганди.
Машғулотлар Ўзбекистон Республикаси Президентининг 2026 йил 26 августдаги “Жамоат хавфсизлигини таъминлаш соҳасида профессионал кадрларни тайёрлаш тизимини янада такомиллаштириш бўйича қўшимча чора-тадбирлар тўғрисида”ги ПҚ–302-сон қарори ижроси доирасида ташкил этилди. Улар Академия ва Жамоат хавфсизлиги университети ўртасида ўзаро маҳорат дарсларини ўтказиш бўйича ҳамкорлик доирасидаги илк амалий машғулотлар бўлди.
“Биринчи тиббий ёрдам асослари ва валеология” модули доирасидаги “Жароҳатларда ва қон кетишларда биринчи тиббий ёрдам” мавзусига бағишланган дарсларда мутахассислар жароҳатлар таснифи, қон кетиш турлари ва белгилари ҳамда биринчи ёрдам кўрсатиш тартиби ва қоидаларини тушунтирди.
Машғулотларнинг амалий қисмида махсус ва қўлбола воситалардан фойдаланиб қон кетишини тўхтатиш, ўз-ўзига ва ўзаро биринчи ёрдам кўрсатиш усуллари кўриб чиқилди.
Маҳорат дарслари талабаларнинг биринчи ёрдам кўрсатиш бўйича билимларини мустаҳкамлаш ва амалий кўникмаларини ривожлантиришга қаратилди. Бу кўникмалар келгуси хизмат фаолиятида фавқулодда вазиятлар юз берганда тўғри ва ўз вақтида ҳаракат қилиш учун муҳимдир.
