“Ўзбекистон саноат-қурилиш банки” АТБ ва “Octobank” АЖнинг назорат ҳамда комплаенс хизматлари ходимлари Ўзбекистон Республикаси Ҳуқуқни муҳофаза қилиш академияси ташкил этган икки кунлик махсус малака ошириш курсларида иштирок этди. Дастур жиноий даромадларни легаллаштиришга қарши курашиш, молиявий хавфларни баҳолаш ва коррупцияга қарши комплаенс механизмларини банк фаолиятида қўллашга бағишланди.
Курслар Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ҳамда Марказий банк билан ҳамкорликда ўтказилди. Машғулотларни Академия профессор-ўқитувчилари, ҳамкор идоралар мутахассислари ва БМТнинг Наркотиклар ва жиноятчилик бўйича бошқармаси экспертлари олиб борди.
Миллий экспертлар иштирокидаги машғулотларда миллий қонунчилик талаблари, Жиноий даромадларни легаллаштиришга қарши молиявий чоралар ишлаб чиқувчи гуруҳ (ФАТФ) стандартлари ва тавсиялари ўрганилди. Тингловчилар молиявий хавфларни аниқлаш ва баҳолаш усуллари, шубҳали операцияларнинг белгилари, уларни таҳлил қилиш ва тегишли чоралар кўриш тартибларини кўриб чиқди. Шунингдек, манфаатлар тўқнашувининг олдини олиш ва уни бошқариш ҳамда санкцияларга оид чекловларга риоя этиш масалалари муҳокама қилинди.
Амалий кейслар асосида таваккалчиликка асосланган ёндашувни қўллаш, мижозларни лозим даражада текшириш ва молиявий операцияларни хавф даражасига қараб баҳолаш тартиблари таҳлил қилинди. Тингловчилар экспертлар билан биргаликда банк амалиётида учрайдиган муаммо ва камчиликларнинг сабаблари, уларни бартараф этишнинг ташкилий-ҳуқуқий механизмлари ҳамда халқаро стандартларни Ўзбекистон банклари фаолиятига татбиқ этиш масалаларини муҳокама қилди.
БМТнинг Наркотиклар ва жиноятчилик бўйича бошқармаси экспертлари дропперлардан фойдаланган ҳолда жиноий даромадларни легаллаштириш типологиялари ва уларнинг фирибгарлик схемаларидаги ролига бағишланган машғулотлар ўтказди. Дропперлар — банк ҳисобварақлари ёки тўлов воситалари жиноий маблағларни ўтказишда ишлатиладиган шахслардир. Амалиётга яқин мисоллар орқали бундай шахслардан фойдаланишга асосланган молиявий схемаларнинг белгилари ва уларни аниқлаш усуллари кўриб чиқилди.
Халқаро экспертлар иштирокида БМТнинг Коррупцияга қарши конвенцияси қоидалари асосида коррупцияга қарши комплаенсни ташкил этиш масалалари ҳам ўрганилди. Амалий мисоллар асосида банк фаолиятида юзага келиши мумкин бўлган коррупциявий хавф-хатарларни баҳолаш усуллари ҳамда тегишли комплаенс механизмларини танлаш ва қўллаш масалалари кўриб чиқилди.
