Ўзбекистон Республикаси Ҳуқуқни муҳофаза қилиш академиясида таълим жараёни ва илмий тадқиқотларни замонавий адабиётлар билан таъминлаш учун ахборот-ресурс базаси тизимли равишда ривожлантирилмоқда. Бу ишларнинг муҳим йўналиши – кутубхона фондини ҳуқуқшунослик, ҳуқуқни муҳофаза қилиш амалиёти ҳамда ижтимоий-гуманитар ва касбий тайёргарликка оид янги дарслик ва ўқув қўлланмалар билан мунтазам бойитишдир.

Янги ҳуқуқий адабиётлар ҳуқуқни муҳофаза қилувчи органлар фаолиятининг ҳуқуқий асослари, тергов фаолияти, прокурор назорати, криминалистика, фуқаролик-ҳуқуқий жавобгарлик, маъмурий ва оила ҳуқуқи йўналишларини қамраб олади. Фондга йўл-транспорт ҳодисалари билан боғлиқ жиноятларни тергов қилишдаги тизимли муаммолар ва уларни ҳал этиш йўллари, шунингдек, ерлардан фойдаланиш ҳамда уларни муҳофаза қилиш соҳасидаги жиноятлар учун жавобгарлик масалаларига бағишланган нашрлар ҳам киритилган.

Ижтимоий-гуманитар ва касбий тайёргарлик йўналишидаги адабиётлар Ўзбекистоннинг энг янги тарихи, социология, касбий ва нутқ маданияти, шахсий ва жамоавий ҳимоя воситаларига бағишланган. Улар ҳуқуқий адабиётларни мазмунан тўлдириб, таълим олувчиларнинг дунёқараши, мулоқот маданияти ва касбий билимларини ривожлантиришга хизмат қилади.

Янги нашрлар талабалар ва тингловчиларнинг машғулотларга тайёрланиши, ўқув мавзуларини мустақил ўзлаштириши ҳамда тадқиқотчиларнинг илмий манбаларни танлаш ва таҳлил қилиши учун имкониятларни кенгайтиради.