Ўзбекистон Республикаси Ҳуқуқни муҳофаза қилиш академиясининг ишчи гуруҳи Тошкент вилояти Олмалиқ шаҳрининг “Ҳамза” маҳалласида криминоген вазиятни ўрганди. Академия бошлиғининг ўринбосари А. Одинаев ва профессор-ўқитувчилар иштирокида ҳуқуқбузарликларнинг келиб чиқиш сабаб ва шарт-шароитлари, жиноятчилик ҳолатига таъсир этувчи омиллар таҳлил қилинди.

Ўрганиш Академиянинг Олмалиқ ва Ангрен шаҳарларида олиб бораётган комплекс илмий-амалий ишлари доирасида ўтказилди. Мазкур ишлар Ўзбекистон Республикаси Президентининг 2025 йил 3 январдаги ПҚ–1-сон қарорида белгиланган маҳаллаларда хавфсиз муҳит яратиш ва ҳуқуқбузарликларнинг барвақт олдини олиш вазифалари ижросига қаратилган.

Ҳамза маҳалласидаги таҳлил натижасида ҳуқуқбузарликларнинг ўзига хос хусусиятлари баҳоланиб, аниқланган омилларни ҳисобга олган ҳолда манзилли профилактикани ташкил этиш бўйича илмий асосланган таклифлар берилди.

Академия томонидан Олмалиқ ва Ангрен шаҳарларида ўтказилган ўрганишлар асосида ишлаб чиқилган тавсиялар ҳозирда амалиётга татбиқ этилмоқда. Бу жараёнда профилактика ишларининг натижадорлиги мунтазам баҳоланиб, кўрилаётган чораларнинг ҳудудлардаги ҳуқуқбузарликлар ҳолатига таъсири ўрганилмоқда.

Шунингдек, маҳаллаларда профилактика тизимини мустаҳкамлаш мақсадида Академия томонидан «маҳалла еттилиги» аъзолари учун ўқув-семинарлар ташкил этилмоқда.