Ўзбекистон Республикаси Ҳуқуқни муҳофаза қилиш академиясида профессор-ўқитувчиларнинг педагогик маҳорати ва хорижий тилларда касбий мулоқот қилиш кўникмаларини ривожлантириш бўйича тизимли ишлар олиб борилмоқда. Ушбу жараёнда халқаро таълим тажрибасини ўрганиш, замонавий ўқитиш методларини ўзлаштириш ва кўп тилли таълим муҳитини мустаҳкамлашга алоҳида эътибор қаратилмоқда.
Бу йўналишдаги навбатдаги ўқув машғулоти Тошкент шаҳридаги Халқаро Вестминстер университетининг катта ўқитувчиси, таълим соҳасидаги халқаро эксперт Гунжан Жайн (Gunjan Jain) иштирокида ўтказилди. Машғулот профессор-ўқитувчиларнинг юридик инглиз тили бўйича билим ва кўникмаларини ривожлантириш ҳамда илғор педагогик ёндашувларни ўқув жараёнида қўллаш масалаларига бағишланди.
Очиқ мулоқот ва фикр алмашинуви давомида таълим жараёнини самарали ташкил этиш, тингловчиларнинг коммуникатив кўникмаларини ривожлантириш ва замонавий педагогик технологиялардан фойдаланиш масалалари муҳокама қилинди. Касбий ва тил тайёргарлигининг уйғунлиги ҳуқуқий мавзуларда хорижий тилда мулоқот қилиш, халқаро манбалар билан ишлаш ва улардан таълим жараёнида фойдаланиш нуқтаи назаридан муҳим аҳамиятга эга.
Машғулот давомида эксперт профессор-ўқитувчиларга халқаро таълим тажрибасини амалиётга татбиқ этиш, ўқитиш усулларини такомиллаштириш ва тингловчиларнинг мулоқот кўникмаларини ривожлантириш бўйича тавсиялар берди.
