Она тилига ҳурмат, давлат тилида саводли иш юритиш ва сўз масъулияти прокуратура, Департамент ҳамда Бюро органлари ходимлари ўртасидаги «Миллат она тили билан тирикдир!» анъанавий танловида ўз ифодасини топди. 2026 йилнинг сентябрь–октябрь ойларида икки босқичда ўтказилган танлов бу йил олтинчи бор ходимларнинг тил билими, таҳлилий фикрлаш ва нутқ маҳоратини синовдан ўтказди.
2021 йилдан буён ташкил этиб келинаётган танлов ходимларнинг нутқ маданиятини юксалтириш, давлат тилида саводли иш юритиш кўникмаларини мустаҳкамлаш ва она тилига садоқат туйғусини камол топтиришга қаратилган. Унинг Ўзбек тили байрами куни арафасида ўтказилиши мазкур мақсадларга алоҳида маънавий мазмун бағишлайди.
Танловнинг биринчи босқичи Қорақалпоғистон Республикаси, вилоятлар ва Тошкент шаҳар прокуратураларида, Департамент, Бюро, Транспорт ва Ҳарбий прокуратураларда ўтказилди. Ҳар бир йўналиш бўйича биринчи ўринни эгаллаган ходимлар якуний босқичга йўлланма олдилар. Бош прокуратура маҳкамаси ходимлари ўртасида ҳам уч йўналиш бўйича биринчи босқич танлови ташкил этилди.
9 октябрь куни Ҳуқуқни муҳофаза қилиш академиясида ўтказилган финалда тизимли-таҳлилий иш, саводхонлик ҳамда шеърият ва нотиқлик йўналишларининг ҳар бирида 19 нафардан ходим иштирок этди.
Тизимли-таҳлилий иш йўналишида иштирокчилар давлат тилини ривожлантириш ва муҳофаза қилишга оид долзарб масалалар юзасидан тайёрлаган ишларини ҳимоя қилдилар. Уларда давлат тили ҳақидаги қонунчилик ижроси устидан прокурор назоратини такомиллаштириш, жамоатчилик назорати ва прокуратура органлари ҳамкорлиги, хорижий тажриба ҳамда сунъий интеллект ва интернет муҳитида давлат тилини ривожлантириш бўйича таҳлилий ечимлар ва аниқ таклифлар тақдим этилди.
Ишлар холис баҳолаш мақсадида шифрланган ҳолда кўриб чиқилди. Қўшимча таҳлил воситаси сифатида сунъий интеллект технологияларидан ҳам фойдаланилди. Якуний баҳолар ва қарорлар Ҳайъат аъзоларининг касбий хулосалари асосида қабул қилинди.
Саводхонлик йўналишида финалчилар лотин ёзувида диктант ёздилар. Шеърият ва нотиқлик йўналишида эса «Ватан», «Мустақиллик», «Ўзбек тили» ва «Касб» мавзулари бўйича шеърларни ёддан айтиб, мазмунини таҳлил қилдилар ҳамда нутқ сўзладилар. Бу йил мазкур йўналишда илк бор нотиқлик маҳорати ҳам баҳоланди.
Иштирокчиларнинг ишлари ва чиқишларини давлат тили, адабиёт ва филология соҳалари мутахассислари, жумладан, шоирлар Салим Ашур ва Эшқобил Шукур, шунингдек, Бош прокуратура ҳамда Академиянинг тажрибали ходимларидан иборат Ҳайъат баҳолади.
Якуний натижаларга кўра, ҳар бир йўналишда совринли ўринлар ва махсус номинациялар ғолиблари аниқланди. Ғолиблар Ўзбек тили байрами куни арафасида тақдирланади. Совринли ўрин соҳибларига пул мукофотлари ва дипломлар топширилади, шунингдек, совриндорлар ҳамда махсус номинациялар ғолиблари учун қўшимча рағбатлантириш чоралари назарда тутилган.
