Ҳуқуқни муҳофаза қилиш академияси Иқтисодий жиноятларга қарши курашиш департаменти ва Марказий банк билан ҳамкорликда банк ходимлари учун икки кунлик махсус малака ошириш курсларини ўтказди. Машғулотлар жиноий даромадларни легаллаштириш ва терроризмни молиялаштиришга қарши курашиш, молиявий мониторинг ҳамда коррупцияга қарши комплаенс тизимини такомиллаштиришга бағишланди.

Курсларда АТ «Инфинбанк», АЖ «Гарант банк» ва АТБ «Пойтахт банк» ходимлари иштирок этди. Академия профессор-ўқитувчилари, Марказий банк ва Департамент мутахассислари ФАТФнинг халқаро стандартлари, молиявий таваккалчиликларни баҳолаш, мижозларни лозим даражада текшириш ва санкциявий чекловларга риоя этиш масалалари бўйича машғулотлар ўтказдилар. Шунингдек, шубҳали ва гумонли операцияларни аниқлаш ҳамда ички назорат тизимини ташкил этиш бўйича назарий билимлар амалий мисоллар билан мустаҳкамланди.

БМТнинг Наркотиклар ва жиноятчилик бўйича бошқармаси вакили А.Ирманов «БМТнинг Коррупцияга қарши конвенцияси қоидалари асосида коррупцияга қарши комплаенсни ташкил этишнинг айрим масалалари» мавзусида амалий машғулот ўтказди.

Машғулотлар доирасида банк амалиётида учраётган долзарб муаммолар, уларнинг олдини олиш механизмлари, коррупциявий хавф-хатарларни камайтириш ва халқаро тажрибани миллий амалиётга татбиқ этиш масалалари ҳам муҳокама қилинди.

Курсларда олинган билим ва амалий ёндашувлар банкларда молиявий таваккалчиликларни баҳолаш, шубҳали ва гумонли операцияларни аниқлаш ҳамда ички назорат механизмларини такомиллаштиришда қўлланиши кўзда тутилган. Шу орқали ўқувлар молия тизимида шаффофликни таъминлаш ва қонун устуворлигини мустаҳкамлашга хизмат қилади.