Прокуратура органларига илк бор хизматга қабул қилинган ходимлар учун касбий қайта тайёрлаш курси тингловчилари Ўзбекистон прокуратураси прокуратура тарихи музейига ташриф буюриб, соҳа тараққиёти ва хизмат анъаналари билан танишди.

Музей экспозицияси 7 та тематик бўлим ва 36 та асосий стенддан иборат. Унда 5 мингга яқин архив ҳужжати, 7 мингдан ортиқ фото ва видеоматериал ҳамда 2 мингга яқин тарихий аҳамиятга эга экспонат жамланган. Экспозициялар прокуратура органларининг шаклланиши ва ривожланиши, қонунийликни таъминлаш ва адолатни қарор топтириш йўлидаги фаолиятини ёритади.

Тингловчилар мамлакатимиз ҳудудида давлатчилик ва ҳуқуқ тизимининг шаклланишидан бугунги прокуратура тизимигача бўлган тарихий босқичлар билан танишди. Алоҳида экспозицияларда сиёсий қатағонлар даврида ноҳақ жазоланган, отиб ташланган ёки сургун қилинган юртдошларимиз, жумладан, суд-ҳуқуқ ва прокуратура тизими ходимлари тақдири ҳақидаги маълумотлар ўрин олган. «Янги Ўзбекистон прокуратураси фаолияти» бўлимида эса сўнгги йиллардаги ислоҳотлар ва тизимнинг институционал янгиланишлари акс эттирилган.

Ташриф тингловчиларга прокуратуранинг тарихий тажрибаси ва хизмат анъаналари билан танишиш, қонунийликни таъминлашдаги касбий масъулиятни чуқурроқ англаш имконини берди.