Ўзбекистон Республикаси Ҳуқуқни муҳофаза қилиш академияси ҳузуридаги DSc.24/2026.31.01.Yu.01.02 рақамли Илмий кенгаш мажлисида Холмирзаев Муҳсин Шавқиддин ўғлининг «Жиноятчиликни криминологик прогнозлаш соҳасини такомиллаштириш масалалари» мавзусидаги диссертация иши ҳимояси бўлиб ўтди. Иш 12.00.15 – «Криминология» ихтисослиги бўйича юридик фанлар бўйича фалсафа доктори (PhD) илмий даражасини олиш учун тақдим этилди.
Тадқиқотнинг мақсади жиноятчиликни криминологик прогнозлашни комплекс илмий-назарий ва амалий жиҳатдан ўрганиш, Ўзбекистон Республикасининг қонунчилиги ва ҳуқуқни қўллаш амалиётини такомиллаштиришга қаратилган илмий асосланган таклиф ва тавсиялар ишлаб чиқишдан иборат.
Тадқиқотда маҳаллаларда криминоген вазиятга таъсир этувчи омиллар билан ишлаш бўйича ҳар чораклик манзилли чора-тадбирларни белгилаш, уларнинг ижроси учун маҳалла, туман ва вилоят даражасида масъул раҳбарларни бириктириш зарурати асослантирилган. Шунингдек, «Ижтимоий профилактика ҳафталиги»ни ойда бир марта ўтказиш, терговчи ва суриштирувчилар томонидан жиноят омилларини аниқлаб, уларни бартараф этиш чораларини кўриш юзасидан профилактика органларига тақдимномалар киритиш таклиф этилган.
Илмий янгиликлардан яна бири – «Э-жамоат хавфсизлиги» ягона автоматлаштирилган ахборот тизимида «Э-криминология» модулини яратиш ва такомиллаштириш зарурати асосланганидир. Модуль Ўзбекистон Республикаси Криминология тадқиқот институти фаолиятини рақамлаштириш ва электрон иш юритишни назарда тутади.
Тадқиқотнинг амалий аҳамияти «криминологик прогноз қилиш» ва «криминологик прогноз» тушунчаларига муаллифлик таърифлари, прогнозлаш босқичлари ва методологиясига доир талаблар, шунингдек прогнозлаш ва башорат қилишни фарқлаш мезонлари ишлаб чиқилганида намоён бўлади. Муаллиф томонидан «Прокуратура тўғрисида»ги ва «Шахсга доир маълумотлар тўғрисида»ги қонунларга ўзгартириш киритиш бўйича таклифлар, махсус дастурий таъминот концепцияси, ҳудудларда жиноятчиликни прогноз қилиш методологияси ҳамда криминологик хариталарни ишлаб чиқиш механизми тайёрланган.
Ҳимоя натижаларига кўра, Холмирзаев Муҳсин Шавқиддин ўғлининг диссертация иши Илмий кенгаш томонидан юридик фанлар бўйича фалсафа доктори (PhD) илмий даражасини беришга тавсия этилди.
