Қирғиз Республикаси делегацияси Ўзбекистон Республикаси Ҳуқуқни муҳофаза қилиш академияси Рақамли криминалистика илмий-тадқиқот институти фаолияти билан танишди. Институтда мутахассислар тайёрлаш рақамли далилларни илмий тадқиқ этиш, суд экспертизаларини ўтказиш ва терговларга кўмаклашиш билан узвий боғланган.

Институтнинг таълим, ўқув-услубий, илмий-тадқиқот ва суд-экспертлик йўналишларидаги фаолияти кибержиноятларни тергов қилиш, рақамли далилларни аниқлаш, қайд этиш ва тадқиқ қилиш бўйича мутахассисларда махсус билим ва амалий кўникмаларни шакллантиришни қамраб олади. Рақамли криминалистиканинг замонавий усуллари таълим жараёнида ҳам, экспертлик амалиётида ҳам қўлланади.

Институт компьютер-техник экспертизалар ўтказади, мобил қурилмалар ва электрон маълумотларни тадқиқ қилади. Шунингдек, рақамли терговлар олиб бориш ва кибержиноятчиликка қарши курашишда ҳуқуқни муҳофаза қилувчи органларга амалий ёрдам кўрсатади.

Амалий тайёргарликнинг алоҳида йўналиши – Dark Web ўқув лабораторияси. Унда тингловчилар яширин интернет тармоқларида рақамли далилларни излаш ва қайд этишни ўрганади. Киберлаборатория базасида криптовалюталар ва Darknet тармоғидан фойдаланиб содир этилган жиноятларни тергов қилиш бўйича курслар ва тадқиқотлар ўтказилади. Шу тариқа, Институтда кадрлар тайёрлаш рақамли далиллар билан ишлаш ва терговларга амалий кўмак кўрсатиш билан бевосита боғланган.

Ташриф давомида Қирғиз Республикаси делегацияси Академиянинг кадрлар тайёрлаш, илмий тадқиқотлар, суд-экспертлик фаолияти ва рақамли терговларни амалий қўллаб-қувватлашни бирлаштирган рақамли криминалистикага комплекс ёндашуви билан танишди.