Академиянинг Марказий ва Шарқий Европа ҳуқуқий ташаббус институти билан ҳамкорлик истиқболлари муҳокамаси

Жорий йилнинг 14 апрель куни Академия вакилларининг Марказий ва Шарқий Европа ҳуқуқий ташаббус институти (CEELI) дастурлар директори Марек Свобода билан видеоконференцалоқа тартибида учрашув бўлиб ўтди.

Прага (Чехия Республикаси)да жойлашган CEELI Институти ҳуқуқшунослар тармоғини ривожлантириш ва ўқитиш билан шуғулланувчи мустақил нотижорат ташкилоти ҳисобланади. Институт қонунларга асосланган жамиятларни яратиш мақсадида прокурорлар, терговчилар, ҳуқуқшунослар ва фуқаролик жамияти вакиллари билан инновацион ўқитиш дастурлари ва тадбирлар орқали ишлаб келади.

Учрашув Ўзбекистондаги “Минтақавий мулоқот” ХННТ томонидан жалб қилиниб, айни пайтда Академиянинг Коррупцияга қарши курашиш илмий-таълим марказига экспертлик ёрдамини кўрсатиб келаётган словениялик эксперт Горан Клеменчич кўмагида ташкил этилди. Ушбу эксперт муқаддам қайд этилган Институт билан ҳуқуқни муҳофаза қилувчи ва терговчилар учун коррупцияга қарши курашиш соҳасидаги тренингларни ташкил этишда ҳамкорлик қилиш амалиётига эга бўлган.

Тарафлар Академиянинг коррупцияга қарши курашиш соҳасидаги фаолиятига экспертлик кўмагини кўрсатиш, шунингдек Академиянинг магистратура тингловчилари учун масофавий шакллар ёрдамида маърузаларни ўтказиш масалаларини муҳокама қилиб олдилар.