Халқаро коррупцияга қарши курашиш кунига бағишланган тадбирларнинг Академия томонидан қўллаб-қувватланиши

Бош прокуратура Академияси Халқаро коррупцияга қарши курашиш кунига бағишланган туркум тадбирлар доирасида давлат органлари ва муассасаларида мавзуга доир турли форумлар, конференциялар, давра суҳбатлари ва бошқа тадбирларнинг ўтказилишида эксперт кўмагини кўрсатмоқда. 

Жумладан, Коррупцияга қарши курашиш илмий-таълим маркази прокурори “Коррупция миллий хавфсизликка таҳдид” мавзусидаги ёшлар форумида мавзуга доир тақдимот ўтказди. Тадбир ДБҚ Божхона институтида Ўзбекистон Ёшлар иттифоқи ҳамкорлигида Божхона институти, ИИВ Академияси ва Миллий гвардиянинг Ҳарбий-техник институти курсантлари ва профессор-ўқитувчилар иштирокида ташкил этилди.

Марказ вакили форум доирасида ушбу таълим муассасалари курсантлари ўртасида ўтказилган “энг яхши тақдимот ва чиқиш”, “энг яхши видеоролик” ва “энг яхши баннер” номинацияларидаги коррупцияга қарши курашиш танловида ҳакам аъзоси сифатида иштирок этди ва ушбу танлов якунлари бўйича ғолибларни тақдирлаш тадбири ўтказилди.

Бундан ташқари, Марказ ходимлари Олий аттестация комиссияси, Вестминстер университети, Ички ишлар органлари ходимларини бошланғич тайёрлаш ва малакасини ошириш маркази, Молия вазирлиги ҳузуридаги Ўқув маркази, Судьялар олий кенгаши хузуридаги Судьялар олий мактаби, Лойиҳа бошқаруви миллий агентлиги ва бошқа муассасаларда шунга ўхшаш тадбирлар ўтказилишида иштирок этишди.

Шу билан бир қаторда, Марказ бошлиғи “Ўзбекистон 24” телеканалидаги “Ислоҳотлар самараси” ток-шоусининг навбатдаги сонида жонли эфирда “Ўзбекистон Республикасида коррупцияга қарши кураш” мавзусида чиқиш қилди.

Мазкур йўналишдаги тадбирлар давом этмоқда.