Коррупцияга қарши курашиш йўналишида халқаро конференция ўтказилиши тўғрисида эълон

Бош прокуратура Академиясида Ўзбекистонда коррупцияга қарши курашиш чора-тадбирларини такомиллаштириш масалаларига оид навбатдаги халқаро тадбир ўтказилмоқда.

Ўзбекистон Республикаси Президентининг 2020 йил 29 июндаги «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги ПФ–6013-сонли Фармони ижроси доирасида Бош прокуратура Академияси томонидан халқаро ҳамкорлар кўмагида «Ўзбекистонда коррупцияга қарши курашиш чора-тадбирларини такомиллаштириш» мавзусида туркум тадбирлар ўтказилмоқда.

2020 йил 15 июль куни Академияда «Давлат хизматчилари активларини декларациялашнинг замонавий механизмлари» мавзусида халқаро онлайн веб-конференция ўтказилади. Тадбирда Бош прокуратура раҳбарияти ва вакиллари, ИҲТТ, Жаҳон банки, БМТ Гиёҳвандлик ва жиноятчилик бўйича бошқармаси, БМТ Тараққиёт Дастури, Европа Кенгаши, Армения, Грузия, Украина, Корея Республикаси, Руминия, Украина давлатларидан хорижий экспертлар, шунингдек миллий экспертлар иштирок этиши кутилмоқда.

Конференция доирасида Ўзбекистонда давлат хизматчиларининг даромадлари, мол-мулки ва манфаатларини декларация қилиш тизимини жорий этишнинг концептуал асослари, бу борада мавжуд хорижий давлатлар ёндашуви, ижобий ва муваффақиятсиз тажрибалар, декларация қилиш тизимини жорий этиш босқичлари ҳамда бошқа долзарб масалалар муҳокама этилади.

Тадбирда иштирок этиш линки (ZOOM link: https:undp.zoom.us/j/91405182489).

Қўшимча маълумот олиш учун рақам: 71-202-04-96 (ички 1736), e-mail: bi.ismailov@proacademy.uz.