«Ўзбекистонда коррупцияга қарши курашиш чора-тадбирларни такомиллаштириш» мавзусида туркум тадбирлар ўтказилмоқда

Ўзбекистон Республикаси Президентининг 2020 йил 29 июндаги «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги ПФ–6013-сонли Фармони ижроси доирасида Бош прокуратура Академияси томонидан халқаро ҳамкорлар кўмагида «Ўзбекистонда коррупцияга қарши курашиш чора-тадбирларни такомиллаштириш» мавзусидаги туркум тадбирлар ўтказилмоқда.

2020 йил 21 июль куни “Коррупцияга карши курашишда ҳуқуқни муҳофаза қилиш фаолияти самарадорлигини ошириш” мавзусидаги онлайн халқаро веб-конференция ўтказилди. Тадбирда Бош прокуратура раҳбарияти ва ходимлари, ИҲТТ, Европа Кенгашининг Иқтисодий жиноятчиликка қарши курашиш ва ҳамкорлик қилиш бошқармаси, БМТ НЖҚБ, Активларни қайтариш бўйича халқаро маркази (ICAR), “Минтақавий мулоқот” ХННТ, Молдова, Руминия, Словения, Украиналик экспертлар ҳамда 20 дан ортиқ халқаро ва хорижий ташкилотлар, илмий ва таълим муассаса ва идораларининг вакиллари иштирок этдилар.

Конференция доирасида коррупцияга қарши курашиш борасида ҳуқуқни муҳофаза қилиш фаолиятини мувофиқлаштириш, ваколатли органлар мақсад ва вазифаларини такомиллаштириш, коррупциявий қилмишларни криминаллаштириш, коррупциявий жиноятларни аниқлашда янги усул ва воситаларни қўллаш, етказилган зарарни тўла қоплаш, коррупцияга қарши курашиш борасидаги халқаро нормаларни миллий қонунчиликка имплементация қилиш, жиноий йўллар билан топилган маблағ ва активларни мусодара этиш борасидаги хорижий давлатлар ёндашуви ва бошқа масалалар муҳокама этилди.

Табирда сўзга чиққан Европа Кенгашининг Иқтисодий жиноятчиликка қарши курашиш ва ҳамкорлик қилиш бошқармаси бошлиғи – Мустафа Ферати, Европа Кенгашининг Иқтисодий жиноятчиликка қарши курашиш ва хамкорлик қилиш бўлими бошлиғи – Елена Жолик, Руминия Миллий коррупцияга қарши директоратининг (DNA) Прокурор хизмати маслаҳатчиси – Анка Юрма, “Минтақавий мулоқот” ХННТ ҳуқуқий маслаҳатчиси, Словения Коррупцияга қарши курашиш комиссияси собиқ рахбари – Горан Клименчич, Молдова Республикаси Ҳукуматининг Жиноий даромадларни легаллаштиришнинг олдини олиш ва курашиш Офиси бошлиғи – Оксана Гиска ва бошқалар коррупцияга қарши курашиш борасидаги халқаро нормаларни миллий қонунчиликка имплементация қилиш, жиноий йўллар билан топилган маблағ ва активларни мусодара этиш билан боғлиқ муаммолар ва уларнинг ечимлари билан фикр алмашиб, Ўзбекистонда ушбу соҳада энг илғор хорижий амалиётни татбиқ этиш борасида амалий ёрдам кўрсатишга тайёр эканликларини билдирдилар.