Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида халқаро ҳамкорликни ривожлантириш

2020 йил 29 сентябрь куни видеоконференцалоқа режимида Бош прокуратура Академияси ва Молиявий мониторинг халқаро ўқув-методик маркази (Россия Федерацияси) ўртасида жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида кадрларни тайёрлаш бўйича ҳамкорлик тўғрисидаги Келишувни имзолаш маросими бўлиб ўтди.

Молиявий мониторинг халқаро ўқув-методик маркази (Марказ) фаолиятининг мақсади жиноий фаолиятдан олинган даромадларни легаллаштиришга, терроризмни молиялаштиришга қарши курашиш масалаларида Россия Федерациясининг халқаро ташкилотларда иштирокини таъминлаш, ўқув-методик тадбирлар ташкил этиш ва ўтказиш, шу жумладан қўшимча профессионал таълим дастурларини амалга ошириш, илмий-тадқиқот ишларини, баҳолаш ва экспертизани ташкил этиш ва ўтказиш, институционал ва кадрлар потенциалини ривожлантириш мақсадида билим ва тажрибаларни етказиш орқали техник кўмак беришдан иборат.

Келишув тажриба алмашиш, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида илғор ва муваффақиятли тажрибаларни ўрганиш, умумлаштириш  ва тарқатиш, шу жумладан таълим дастурлари ва бошқа тадбирларни ташкил этиш ва ўтказишни назарда тутади.

Келишувни имзолаш доирасида Бош прокуратура Академиясининг таълим жараёнида жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида ходимларни тайёрлаш, қайта тайёрлаш ва малакасини ошириш ягона тизимини ташкил этиш бўйича Марказнинг тажрибасидан фаол фойдаланиш бўйича келишиб олинди.

Томонлар имзоланган ҳужжат ўзаро манфаатли ҳамкорлик муносабатларини яхшилашга хизмат қилишини таъкидлаб, уни самарали амалга ошириш бўйича тадбирларни белгилаб олишди.