Ҳамкорликни ривожлантириш масалалари муҳокамаси

2020 йилнинг 16 ноябрь куни Бош прокуратура Академиясида Ўзбекистон Республикаси Соғлиқни сақлаш вазири ўринбосари А.А.Азизов бошчилигидаги вазирликнинг бир гуруҳи ходимларининг танишув ташрифи амалга оширилди.

Учрашув кадрларни тайёрлаш, қайта тайёрлаш ва малакасини ошириш соҳасида тажриба алмашиш ҳамда икки томонлама ҳамкорликни кенгайтириш масалаларини муҳокама қилиш мақсадида ташкиллаштирилди.

Учрашувда Тошкент врачлар малакасини ошириш институти ҳамда вазирликнинг соҳавий тармоқлари раҳбарлари иштирок этишди.

Иштирокчилар Академиянинг илғор таълим ва ахборот-коммуникация технологиялари, амалиётга йўналтирилган компетенциявий ёндашув, интерактив ва муаммоли методлар асосида ўқув жараёнини ташкил этиш борасидаги тажрибаси билан танишдилар.

Академиянинг ўз электрон платформаси негизида фаолият юритаётган ва коронавирус пандемияси шароитида алоҳида долзарблик касб этган электрон (масофавий) таълимни тизимли жорий этиш имконини берган «ProAcademy» ахборот-таълим портали меҳмонларда қизиқиш уйғотди.

Бўлиб ўтган учрашув халқаро стандартлар ва замонавий талабларга жавоб берадиган ходимларни тайёрлаш соҳасида Академия ва Институт ўртасидаги ҳамкорликни янада ривожлантиришга хизмат қилади.