Россия Федерацияси Тергов қўмитаси билан ҳамкорлик доирасида туркум тадбирлар ўтказилди

2020 йил 18 ноябрь куни Бош прокуратура Академияси ва Россия Федерацияси Тергов қўмитаси томонидан ташкил қилинган “Кадрлар тайёрлаш ва илмий-тадқиқот фаолияти соҳаларида ҳамкорликнинг истиқболли йўналишлари” мавзусидаги онлайн давра суҳбати бўлиб ўтди.

Тадбирда Россия Федерацияси Тергов қўмитаси, Россия Федерацияси Тергов қўмитасининг Москва ва Санкт-Петербург академиялари ҳамда уларнинг ҳудудий филиаллари вакиллари, шунингдек Ўзбекистон Республикаси бош прокуратураси Академияси ходимлари ва магистрантлари иштирок этди.

Тадбир прокуратура-тергов соҳаси кадрларини тайёрлаш ва малакасини ошириш борасидаги долзарб масалаларни муҳокама қилиш, шунингдек таълим муассасаларининг ўзаро манфаатли йўналишларда икки томонлама ҳамкорлигини янада кенгайтириш борасида фикр алмашиш учун қулай имконият бўлиб хизмат қилди.

Иштирокчилар замонавий таҳдидлар ва хавф-хатарларни инобатга олган ҳолда юксак талабларга жавоб берадиган прокурор-тергов кадрлари тайёрлашга йўналтирилган илм-фан, таълим, таҳлил ва амалиёт интеграциялашувининг асосий жиҳатларини кўриб чиқишди.

Шунингдек, академик мобилликни ҳамда илмий-тадқиқот соҳасида халқаро ҳамкорликни ривожлантириш, таълим жараёнига компетенциявий ва фанлараро ёндашувлар ҳамда андрагогик принципларни жорий этиш, электрон (масофавий) таълимни кенгайтириш ва сифатини ошириш масалалари муҳокама қилинди.

Тадбир конструктив муҳокамалар ва савол-жавоблар тарзида бўлиб ўтди.

Тадбир якунида ҳамкорликда давра суҳбати материаллари тўплаимни чоп этиш борасида келишиб олинди, шунингдек келгусида Бош прокуратура Академияси ҳамда Россия Федерацияси Тергов қўмитаси Москва академияси билан ўзаро ҳамкорлик тўғрисидаги Битим доирасида белгиланган тадбирларни амалга оширишга доир аниқ чоралар белгилаб олинди.

Шу билан бирга, туркум тадбирлар доирасида 2020 йил 17 ноябрь куни Россия Федерацияси Тергов қўмитаси ҳамда Ўзбекистон Республикаси Бош прокуратураси ҳамда Академия вакиллари иштирокида “Коррупциявий жиноятларни тергов қилиш борасида тажриба алмашиш, уларнинг содир этилиши сабабларини аниқлаш ва бартараф қилиш методлари” мавзусида онлайн режимидаги халқаро давра суҳбати бўлиб ўтди.