ARIN-WCA тармоғининг 2020 йил якуни бўйича йиллик умумий йиғилиши

Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) аъзо давлатларининг 2020 йил якунига бағишланган йиллик умумий йиғилиши бўлиб ўтди.

Мазкур йиғилиш видеоконференцалоқа шаклида, Қирғиз Республикаси Бош прокуратураси раислигида ўтказилиб, унда ARIN-WCAга аъзо давлатлар, БМТнинг Гиёҳвандлик ва жиноятчилик бўйича бошқармаси ходимлари, CARIN ва ARINSA тармоқлари котибиятлари, Буюк Британия, Грузия, Латвия ва Озарбайжоннинг ҳуқуқни муҳофаза қилувчи органлари вакиллари ҳамда халқаро экспертлар иштирок этишди.

ARIN-WCA тармоғининг доимий Котибияти сифатида Бош прокуратура Академияси вакиллари йиғилиш иштирокчиларини 2021 йилда тармоқда раисликни амалга ошириш, Бошқарув гуруҳи таркибини янгилаш ва мазкур тармоқда кузатувчи мақомини белгилаш каби масалалар юзасидан қабул қилинган Бошқарув гуруҳининг тегишли қарори ҳамда 2020 йилда амалга оширилган ишлар юзасидан хабардор қилди.

Тадбир давомида ARIN-WCA аъзолари активларни қайтариш бўйича ижобий тажрибаси ва амалиёти, статистик кўрсаткичлари, қонунчиликдаги янгиликлар, амалиётдаги мавжуд муаммолар юзасидан ўз давлатларининг тақдимотларини амалга оширди.

CARIN ва ARINSA тармоқлари котибиятлари вакиллари учрашув иштирокчилари билан COVID-19 пандемияси даврида активларни қайтариш билан боғлиқ мисоллар, ушбу соҳада бошқа давлатларга амалий ёрдам кўрсатиш бўйича амалга оширилган ташаббуслар, ҳуқуқни муҳофаза қилувчи органлар салоҳиятини ошириш учун ўтказилган ва режалаштирилаётган онлайн тренинглар тўғрисидаги маълумотлар билан ўртоқлашди.

Тармоққа аъзо давлатларнинг илтимосномасига кўра, ARIN-WCA Котибияти томонидан таклиф қилинган Буюк Британия молиявий разведкаси бўлинмаси вакили Қўшма қиролликдаги ваколатли структуравий тузилмалар, активларни таъқиб қилиш, банд солиш, хатлаш ва мусодара қилиш жараёни тўғрисида тайёрланган батафсил тақдимотини намойиш қилди.

Шунингдек, йиғилиш давомида тармоқ аъзолари ARIN-WCAни келгусида самарали бошқариш ва унинг фаолиятини ривожлантириш мақсадида 2021 йилда амалга оширилиши лозим бўлган муҳим вазифа
ва режаларни белгилаб олишди.

Йиллик умумий йиғилиш ишчан руҳда ўтказилиб, иштирокчилар келгусида янада фаол ҳамкорлик қилишга ҳамда ARIN-WCA тармоғини ривожлантиришга тайёр эканликларини тасдиқлашди.