Япония Aдлия вазирлиги билан жиноятчилик аҳволини тизимли ўрганиш йўналишидаги қўшма лойиҳа давом эттирилди

Жорий йилнинг 25 ноябрь куни жиноятчилик ҳолатини узлуксиз мониторинг қилиш салоҳиятини мустаҳкамлаш борасида Япония Aдлия вазирлиги ва Ўзбекистон Республикаси Бош прокуратураси Академияси қўшма ишчи гуруҳининг навбатдаги онлайн учрашуви бўлиб ўтди.

Учрашув давомида Япония томони жиноятларнинг турлари бўйича статистик маълумотларни классификация қилиш тартиби тўғрисида маълумот берди. Жумладан, Японияда аёллар томонидан содир этилган жиноятлар тўғрисида маълумотларни ҳисоботда акс эттириш услубиёти муҳокама қилинди.

Ўз навбатида, Бош прокуратура Академияси томонидан тайёрланаётган ойлик жиноятчилик аҳволи тўғрисидаги тўплам (дайжест) тузилиши намойиш этилди. Япониялик мутахассислар ушбу йўналишда амалга оширилган ишларни қайд этиб, тўпламни янада такомиллаштириш бўйича ўз таклифларини билдирдилар.