Коррупцияга қарши курашиш соҳасида халқаро конференция бўлиб ўтди

2020 йил 27 ноябрь куни Бош прокуратура Академияси томонидан «Юксалиш» умуммиллий ҳаракати, «Тараққиёт стратегияси» маркази билан ҳамкорликда, Ўзбекистон Республикаси Коррупцияга қарши курашиш агентлиги, БМТнинг Гиёҳвандлик ва жиноятчилик бўйича бошқармаси, “Минтақавий мулоқот” ХННТ кўмагида “Коррупцияга қарши курашиш борасида амалий тадқиқотлар ўтказиш: академик ҳамжамият ва нодавлат ташкилотларининг ҳамкорлик масалалари” мавзусида халқаро конференция ўтказилди.

Конференциядан кўзланган мақсад коррупцияга қарши курашиш соҳасида академик доиралар ва нодавлат ташкилотлар ҳамкорлигини кенгайтириш, шунингдек мазкур соҳада жамоатчилик назоратини ривожлантириш масалаларини муҳокама қилишдан иборат.

Тадбирда БМТнинг Гиёҳвандлик ва жиноятчилик бўйича бошқармаси, Hertie бошқарув мактаби (Германия), Кембридж университети (Буюк Британия) экспертлари, “Transparency International” халқаро нодавлат ташкилоти вакиллари, маҳаллий академик доиралар ва фуқаролик жамияти институтлари вакиллари иштирок этишди.

Халқаро конференцияда иштирокчилар коррупцияга қарши курашишда фуқаролик жамияти институтларининг иштироки, давлат харидларини амалга оширишда коррупция ҳолатларини аниқлаш, коррупцияга қарши курашиш соҳасидаги қонунчилик ижроси устидан жамоатчилик назоратини амалга ошириш, бюджет маблағларининг мақсадли сарфланиши устидан назоратни амалга ошириш, давлат хизматчиларининг активлари, даромадлари ва катта харажатлари тўғрисидаги декларацияларининг мувофиқлигини текшириш, давлат органларининг фаолияти тўғрисидаги маълумотларнинг жамоатчиликка етказилишини таъминлаш борасида тажриба алмашдилар.

Фаол муҳокамалар жараёнида фуқаролик жамияти институтлари ва академик ҳамжамият ўртасида коррупцияга қарши курашиш, турли соҳаларда мавжуд ҳолатни таҳлил қилиш, социологик тадқиқотлар ўтказиш, коррупция хавфларини аниқлаш, тадқиқотчи мутахассислар тайёрлаш тизимини ривожлантириш бўйича таклифлар илгари сурилди.

Халқаро конференция якунлари бўйича илмий тавсиялар ишлаб чиқилиб, конференция материалларини нашр этиш режалаштирилди.