Коррупцияга қарши курашиш чора-тадбирларини кучайтириш мақсадида жиноят ва жиноят-процессуал қонунчилигини такомиллаштириш

Бош прокуратура Академиясида Европа Кенгаши, БМТнинг Гиёҳванд моддалар ва жиноятчилик бўйича бошқармаси, Иқтисодий ҳамкорлик ва тараққиёт ташкилоти, «Минтақавий мулоқот» халқаро нодавлат ташкилоти кўмагида «Коррупцияга қарши курашиш чора-тадбирларини кучайтириш мақсадида жиноят ва жиноят-процессуал қонунчилигини такомиллаштириш» мавзусидаги халқаро давра суҳбати бўлиб ўтди.

Давра суҳбати Халқаро коррупцияга қарши курашиш кунига бағишланган коррупцияга қарши курашиш ҳафталигининг якуний тадбири бўлди.

Тадбирда кириш сўзи билан иштирок этган Европа Кенгаши ва Европа Иттифоқининг лойиҳа менеджери Роман Шлапак, ИҲТТ Коррупцияга қарши тармоғи раҳбари Ольга Савран, «Минтақавий мулоқот» ХНТ директори Мьюша Север мамлакат ҳукумати томонидан коррупцияга қарши курашиш чора-тадбирларини кучайтириш бўйича амалга оширилган тадбирларни ва бу соҳада эришилган ютуқларни қайд этиб ўтишди.

Давра суҳбатининг экспертлари сифатида халқаро мутахассислар – Драго Кос, Горан Клеменчич, Владимир Козин иштирок этишди.

Маърузачилар янги таҳрирда ишлаб чиқилаётган Жиноят ва Жиноят-процессуал кодекслари лойиҳаларида коррупцияга қарши курашишга оид қоидаларнинг, шу жумладан мавқеини суиистеъмол қилиш, юридик шахсларнинг жавобгарлиги,  жиноий фаолият натижасидаги даромадларни мусодара қилиш каби коррупцияга оид жиноятлар бўйича эксперт таҳлилини келтиришди.

Муҳокамада миллий академик доиралар, жумладан ИИВ Академияси, Судьялар олий кенгаши ҳузуридаги Судьялар олий мактаби, Бош прокуратура Академияси жиноят ҳуқуқи соҳасидаги профессор ва олимлари иштирок этишди.

Халқаро ва миллий экспертлар миллий қонунчилик хусусиятидан келиб чиққан ҳолда халқаро илғор стандартларни имплементация қилиш масалаларининг муҳокамасини давом эттириш лозимлигини қайд этишди.