Пул маблағлари ёки бошқа мол-мулк билан боғлиқ операцияларни амалга оширувчи ташкилотлар ходимлари учун масофавий малака ошириш курси бошланди

Бош прокуратура Академиясида пул маблағлари ёки бошқа мол-мулк билан боғлиқ операцияларни амалга оширувчи ташкилотларнинг ички назорат хизмати ходимлари иштирокида “Жиноий фаолиятдан олинган даромадларни легаллаштириш ва терроризмни молиялаштиришга қарши курашишни ташкил этиш” мавзусида масофавий малака ошириш курси ташкил этилди.

Малака ошириш курсида аудиторлик ташкилотларининг масъул ходимлари, республика фонд ва товар-хомашё биржаларининг аъзолари ҳамда почта алоқаси операторлари ва провайдерлари иштирок этмоқда.

Курс дастуридан Ўзбекистон Республикасида жиноий фаолиятдан олинган даромадлар ва терроризмни молиялаштириш хавфларини секторлар ва миллий даражада баҳолашни ўтказиш масалалари, жиноий даромадларни легаллаштириш ва терроризмни молиялаштиришга қарши курашиш миллий тизим фаолияти хусусиятларига оид машғулотлар ўрин олган.

Мазкур малака ошириш курси тингловчиларда ички назорат хизмати тизимини ташкил этиш, хавфлар даражасини баҳолаш ва аниқлаш, шунингдек махсус ваколатли давлат органига хабар қилиниши лозим бўлган пул маблағлари ёки бошқа мол-мулк билан боғлиқ операцияларни аниқлашга оид амалий кўникмаларни ривожлантиришга қаратилган.