Кибержиноятларни тергов қилиш масалалари бўйича ўқув семинари бўлиб ўтди

Бош прокуратура Академиясида ҳудудий прокуратура ва ички ишлар органлари терговчилари иштирокида “Ахборот технологиялари соҳасидаги жиноятларни (кибержиноятларни) тергов қилиш масалалари” мавзусида малака ошириш курси ташкил этилди.

Ўқув курсининг биринчи кунида Бош прокурорнинг биринчи ўринбосари Б.Б.Валиев иштирокида ўқув семинари бўлиб ўтди.

Семинарда жорий йилнинг 12 февраль куни ўтказилган ИИВ ҳайъатининг кенгайтирилган йиғилишида Давлатимиз раҳбари томонидан белгиланган вазифалардан келиб чиққан ҳолда тергов фаолиятини такомиллаштиришнинг долзарб масалалари кўриб чиқилди.

Кибержиноятчилик кўрсаткичларининг дунёда ва республикамизда ўсиб бориш тенденциясига эътибор қаратган ҳолда, Б.Б.Валиев тергов фаолиятининг, шу жумладан кибержиноятларни тергов қилишнинг сифати ва самарадорлигини тубдан такомиллаштириш, инсон ҳуқуқларига сўзсиз риоя қилиш, адолат ва қонунийликни қарор топтиришга ҳар томонлама кўмаклашиш каби тергов органлари олдида турган устувор вазифаларни таъкидлаб ўтди.

Тергов амалиётидан келтирилган аниқ мисоллар асосида тингловчиларга тергов ҳаракатларини амалга оширишда тўғри мулоқотни шакллантириш, жиноий-ҳуқуқий вазиятни тез ва тўғри баҳолаш ҳамда жиноятларни квалификация қилиш кўникмаларини қўллаш масалалари тушунтириб берилди.

Тингловчилар томонидан муҳокама қилинган мавзунинг долзарблиги ҳамда соҳанинг ўзига хослигини инобатга олган ҳолда доимий малака ошириш лозимлиги таъкидланди.   

Ўқув курси доирасида ахборот-коммуникация технологиялари соҳасида етакчи миллий ва хорижий экспертлар иштирокида назарий ва амалий машғулотлар ўтказилиши назарда тутилган.