Диссертация ишини тайёрлашда илмий ва ҳуқуқий манбалардан фойдаланиш масалалари юзасидан илмий семинар бўлиб ўтди

Бош прокуратура Академиясида “Илмий тадқиқотни тайёрлашда манбалардан фойдаланиш масалалари” мавзусида илмий семинар ўтказилди.

Семинарда Бош прокуратура Академияси, Тошкент давлат юридик университети ва Судьялар олий кенгаши ҳузуридаги Судьялар олий мактабининг докторантлари ва мустақил изланувчилари онлайн тартибида иштирок этди. Семинарда Академия бошлиғи ўринбосари, ю.ф.д., проф. М.Мамасиддиқов ва Академия кафедра бошлиғи, ю.ф.ф.д., доцент Х.Каримов маъруза қилди.

Илмий семинар очиқ мулоқот ва савол-жавоб тарзида олиб борилди. Докторант ва мустақил изланувчилар томонидан диссертация иши бўйича ижтимоий сўровлар ўтказиш, тадқиқот натижаларини асослашда статистик маълумотлардан фойдаланиш, диссертацияга ҳавола этилаётган манбаларни расмийлаштириш ҳамда бошқа долзарб йўналишлар бўйича саволлар берилди.

Академия профессор-ўқитувчилари томонидан диссертация юзасидан ижтимоий сўров ўтказиш, статистик маълумотлар ва суд амалиёти материалларидан фойдаланишнинг муҳимлиги, уларнинг диссертация натижаларини асослаш билан боғлиқ бўлиши ва албатта ишончли манбаларга таяниши лозимлиги таъкидланди.

Тадбир баҳс-мунозараларга бой тарзда ўтди. Иштирокчилар бу каби туркум илмий семинарлар ҳамкор идоралар ва таълим муассасаларининг тадқиқотчилари иштирокида олиб борилишини қўллаб-қувватладилар.