Маҳаллалардаги криминоген вазият ўрганилмоқда

Ҳуқуқбузарликлар профилактикаси фаолиятини илмий-методик таъминлаш ҳамда жойларда криминоген вазиятни ўрганиш мақсадида Бош прокуратура Академиясининг бир гуруҳ ходимлари ҳудудларда криминоген хавфлар даражасига кўра “қизил” тоифага киритилган маҳаллаларда ўрганишлар олиб бормоқда.

Ўрганиш жараёнида асосий эътибор маҳаллалардаги криминоген вазиятнинг ўзига хос ҳудудий ва бошқа хусусиятларини аниқлашга қаратилган. Жумладан, ҳудуддаги бино ва иншоотларнинг зичлиги, аҳоли гавжумлиги, ёритиш ва видеокузатув мосламалари билан жиҳозланганлик даражаси, йирик савдо марказлари ва бозорларнинг мавжудлиги, ички миграция даражаси ва бошқа ҳудудлардан келган шахслар томонидан содир этилган жиноятлар салмоғи каби ҳолатлар чуқур таҳлилдан ўтказилди.

Шунингдек куннинг жиноят содир этилган вақти, мавсумий давр, жиноят содир этган шахс “портрети”, жиноятдан жабр кўрганларнинг виктимологик хусусиятлари ва шу каби омиллар ҳам алоҳида ўрганилди.

Мазкур фаолият доирасида Чилонзор туманидаги “Иқбол” ва “Катта Қозиробод”, Зангиота туманидаги “Бешқўрғон”, Бухоро шаҳридаги “Пири-дастгир” маҳаллаларида сайёр фаолият олиб борилиб, профилактика инспекторлари ҳамда маҳалла фаоллари билан учрашувлар ўтказилди.

Академия томонидан мазкур йўналишдаги ишлар тизимли тарзда давом эттирилади.