Иқтисодий жиноятларга қарши курашиш департаменти криминалистлари иштирокида малака ошириш курси якунланди

Жорий йилнинг апрель ойида Бош прокуратура Академиясида Иқтисодий жиноятларга қарши курашиш департаментининг криминалистлари учун малака ошириш курси ташкил этилди.

Курс давомида криминалистик техника ва экспертиза, криминалистика фаолиятида илғор криминалистик ва илмий-техник воситалардан фойдаланиш, қалбаки пуллар, шу жумладан чет эл валюталари, қалбаки ҳужжатлар ва қимматли қоғозларни аниқлаш бўйича амалий машғулотлар, валютага оид ва порахўрлик жиноятларини фош этиш бўйича ўтказиладиган тезкор-қидирув тадбирларини имитация қилиш бўйича машғулотлар ўтказилди.

Дастур доирасида Департамент, Ички ишлар вазирлиги Академияси масъул мутахассислари, вазирлик ва идоралар экспертлари маърузалар билан иштирок этишди. Шунингдек Х.Сулаймонова номидаги Республика суд экспертизаси маркази, Ички ишлар вазирлиги Эксперт-криминалистика бош марказида сайёр ўқув машғулотлари ташкил этилди.

Ўқув машғулотлари интерактив шаклда ўтказилиб, тингловчилар ўз фаолиятлари билан боғлиқ долзарб масала ва муаммоларни муҳокама қилиш ҳамда уларнинг ечимига оид ўзаро тажриба алмашиш имкониятига эга бўлишди.

Курс якуни бўйича имтиҳон ўтказилиб, курсни муваффақиятли тугатган тингловчиларга сертификатлар топширилди.