Сайлов комиссиялари аъзолари малакасини оширишни ташкил этиш концепцияси тасдиқланди

Бош прокуратура Академияси бошлиғи Ўзбекистон Республикаси Марказий сайлов комиссиясининг навбатдаги йиғилишида иштирок этди. Мажлисда Сайлов комиссиялари аъзолари малакасини оширишни ташкил этиш концепцияси лойиҳаси муҳокама қилинди.

Тадбирда шунингдек Марказий сайлов комиссияси аъзолари ва ходимлари, илмий ва олий таълим муассасаларининг сайлов ҳуқуқи бўйича экспертлари, оммавий ахборот воситалари вакиллари иштирок этди.

Муҳокама якунига кўра Ўзбекистон Республикаси Марказий сайлов комиссияси Бош прокуратура Академияси ҳамда республикамизнинг қатор таълим ва илмий муассасалари билан биргаликда ишлаб чиқилган Сайлов комиссиялари аъзолари малакасини оширишни ташкил этиш концепциясини тасдиқлади.

Сайлов комиссиялари аъзолари малакасини оширишни ташкил этиш концепцияси сайлов жараёни иштирокчиларининг сайловни ташкил этиш ва ўтказиш бўйича кўникма ва малакасини, сайлов жараёнлари соҳасидаги ҳуқуқий билимини мустаҳкамлашга йўналтирилган.

Концепцияни ишлаб чиқишда ЕХҲТнинг Демократик институтлар ва инсон ҳуқуқлари бўйича бюросининг Ўзбекистонда сайловларни кузатиш бўйича Миссияси Якуний ҳисоботида ўз ифодасини топган тавсиялар ҳисобга олинди.

Концепцияни амалга ошириш уч босқичда рўёбга чиқарилиб, ўқув режалари ва ўқув-услубий материаллар тайёрлаш, “Saylov2021” мобил иловасини ишлаб чиқиш, сайлов қонунчилиги бўйича тренерлар ва сайлов комиссиялари аъзолигига номзодларнинг (аъзоларни) малакасини ошириш ва тайёрлаш, шунингдек сайловчиларнинг ягона электрон рўйхати ва сайлов жараёнини бошқариш ахборот тизимида ишлаш бўйича тренерлар ва сайлов комиссияси аъзолигига номзодларни тайёрлашни назарда тутади.

Машғулотларда замонавий ахборот технологиялари ва интерфаол усулларга эътибор кучайтирилиб, симуляция, сайлов жараёнларини моделлаштириш, видеодарс, видеоролик, сайловга оид савол-жавоблар, тест усуллари фаол қўлланилади. 

Кенг кўламдаги мазкур ишлар сайлов жараёни иштирокчиларининг сайловга оид билим ҳамда кўникмаларининг ошиши, шунингдек, сайлов тизими ва амалиётининг янада такомил топишига хизмат қилади.

Тадбир якунида Ўзбекистон Республикаси Марказий сайлов комиссиясининг Ўзбекистон Республикаси Бош прокуратураси Академияси, Ўзбекистон Республикаси Президенти ҳузуридаги Давлат бошқарув академияси, Тошкент давлат юридик университети, Ўзбекистон Республикаси Ички ишлар академияси билан мазкур Концепцияда белгиланган вазифаларни амалга ошириш бўйича ўзаро ҳамкорлик юзасидан келишув имзоланди.