Аждодлар хотираси – муқаддас

Хотира ва Қадрлаш куни муносабати билан Бош прокуратура Академияси томонидан мамлакатимиз ҳудудларида бир қатор тадбирлар ташкил этилди. Фарғона вилояти Риштон тумани Зоҳидон қишлоғидаги 3-сонли умумтаълим мактабида туман ҳокимияти ва мактаб маъмурияти томонидан мазкур мактаб битирувчиси, Академия бошлиғининг ўринбосари, ю.ф.д., профессор М.Мамасиддиқов билан ҳамкорликда ташкил этилган маънавий-маърифий тадбир бўлиб ўтди.

Мактаб ўқитувчилари ва ўқувчилари, маҳалла аҳолиси ва меҳмонлардан иборат тадбир иштирокчилари ўтмишда юртимиз тинчлиги ва фаровонлиги йўлида курашган, юксак жасорати авлодлар учун ҳар доим ўрнак бўлиб келган аждодларимизнинг руҳи покларига ҳурмат бажо келтирдилар.

Узоқ йиллар мобайнида ёш авлодни тарбиялаб, уларга илм-фан зиёсини улашган ўз касбига содиқ устозларга алоҳида эътибор ва эътироф билдирилиб, уларга эсдалик совғалар топширилди.

Шу билан бирга, Андижон вилояти Марҳамат туманидаги 13-умумтаълим мактабида ҳам Академия марказ прокурори С.Бердиалиев иштирокида тадбир ташкил этилди. Тадбир якунида мактабга спорт инвентари, мактаб кутубхонасига 400 та китоб совға қилиниб, шунингдек мактаб ҳовлиси видеокузатув камералари билан таъминланди.

Собиқ битирувчиларнинг Хотира ва Қадрлаш куни муносабати билан ўзлари таҳсил олган мактабга ташриф буюришлари яхши анъана бўлиб, ўсиб келаётган авлодда Ватанга муҳаббат ва илмга бўлган интилишни мустаҳкамлашда ижобий намуна бўлиб хизмат қилади.

Мазкур тадбирлар баркамол авлодни ривожлантириш, уларда турли салбий ғояларга нисбатан мустаҳкам маънавий иммунитетни шакллантиришга хизмат қилади.