Прокуратура органлари фаолияти очиқлигини таъминлаш – устувор вазифа

Бош прокуратура Академиясида жорий йилнинг 17-22 май кунлари вилоят прокуратуралари ва уларга тенглаштирилган прокуратураларнинг жамоатчилик билан алоқалар ва ҳуқуқий ахборот бўйича катта ёрдамчилари учун ташкил этилган малака ошириш курси ўтказилди.

Курс ходимларда ҳаққоний ва холис ахборотни тезкорлик билан жамоатчиликка етказишнинг самарали инструментларини қўллаш кўникмаларини ривожлантириш мақсадида ташкил этилган.

Ўқитиш жараёнида тингловчиларда тизимли таҳлил, негатив ва фейк ахборот билан ишлаш, контент-стратегия ва контент-режани шакллантириш, юридик риторика ва креатив PR-инструментларни қўллай билиш кўникмаларини шакллантиришга алоҳида эътибор қаратилди.

Ўқув машғулотлари Бош прокурор ўринбосари С.Б.Артикова, Ўзбекистон Республикаси Президенти Администрацияси ҳузуридаги АОКА бўлим бошлиғи М.Парпиев, Журналистика ва оммавий коммуникациялар университети проректори Н.Муратова, шунингдек журналистика соҳасидаги таниқли тренерлар – Б.Алимов, Г.Шукурова, Г.Нишонова, Н.Қосимова, Н.Тошпўлатова ва Бош прокуратура Академияси ўқитувчилари томонидан ўтказилди.

Курс давомида Ўзбекистон Миллий телерадиокомпаниясига пресс-тур, kun.uz ва daryo.uz интернет-нашрлари ходимлари билан давра суҳбатлари ташкил этилиб, ўзаро тажриба алмашиш, прокуратура органлари ходимлари ва ОАВ ҳамда жамоачилик билан ўзаро ҳамкорлигини янада ривожлантириш масалаларини муҳокама қилиш имконияти яратилди.

Курс сўнгида якуний имтиҳон бўлиб ўтди, тингловчиларга сертификатлар топширилди.