Коррупцияга қарши халқаро стандартларни жорий этиш масалалари муҳокама қилинди

Бош прокуратура Академияси раҳбарияти ва ходимлари Ўзбекистон Республикаси Коррупцияга қарши курашиш агентлиги, “Минтақавий мулоқот” ХННТ ҳамда ИҲТТнинг Коррупцияга қарши курашиш тармоғи билан биргаликда ташкил этилган “Ўзбекистон Республикаси қонунчилигига коррупцияга қарши халқаро стандартларни жорий этиш масалалари” мавзусидаги давра суҳбатида иштирок этдилар.

Тадбир давомида коррупцияга қарши курашишнинг халқаро стандартларини миллий қонунчиликка татбиқ этиш, коррупцияга қарши курашиш соҳасидаги қонунчиликни такомиллаштириш, коррупцияга қарши институционал ва ташкилий ҳуқуқий механизмларни кучайтириш каби масалалар муҳокама этилди.

“Коррупцияга қарши курашиш агентлиги тўғрисида”ги ва “Давлат хизматчиларининг даромадлари, мол-мулки ва манфаатлар тўқнашувини декларация тўғрисида”ги қонун лойиҳаларини муҳокама қилишда Коррупцияга қарши курашиш агентлиги, Ўзбекистон Республикаси Олий Мажлис Сенати ва Қонунчилик палатаси вакиллари, Бош прокуратура Академияси, Aдлия вазирлиги, Aгентлик ҳузуридаги Жамоатчилик кенгаши, академик ҳамжамият вакиллари, халқаро экспертлар қонун лойиҳалари самарадорлигини ошириш, уларнинг концепцияларини амалга оширилаётган ислоҳотлар билан узвий боғлиқлигини таъминлаш борасида ўз фикрларини билдирдилар.

Давра суҳбати давомида коррупцияга қарши курашиш соҳасидаги илғор хорижий тажрибаларни қўллаш, коррупцияга оид ҳуқуқбузарликларни маъмурий тергов қилиш каби ҳуқуқий институтларни такомиллаштириш, давлат хизматчиларининг даромадлари, мол-мулки ва манфаатлари тўқнашувини декларациялаш тизимини жорий этиш, коррупцияга қарши курашишда фуқаролик жамияти институтлари ва илмий доираларни жалб қилиш бўйича тавсиялар ишлаб чиқилди.